कोल्हापूर : शाहू मिल कंपौंडशेजारील रिकाम्या जागेत ट्रक उभे करण्यासाठी बारा हजार रुपयांची खंडणी दिली नाही. या रागातून ट्रकमालकासह क्लिनरला बेदम मारहाण केली. अमर शशिकांत व्हडगे (वय २९), क्लिनर सुभान गौस महात (२७, दोघे, रा. यादवनगर) अशी जखमीची नावे आहेत.
व्हडगे यांनी दिलेल्या फिर्यादीनुसार राजारामपुरी पोलीसांनी संशयित सलीम यासीन मुल्ला, फिरोज यासिन मुल्ला, राजू यासिन मुल्ला (सर्व रा. यादवनगर) यांच्यावर सोमवारी (दि. १२) रात्री गुन्हा दाखल केला.अधिक माहिती अशी, अमर व्हडगे व त्यांच्या भावाचे मालट्रक आहेत. ते नेहमी शाहू मिल कंपौंडशेजारील रिकाम्या जागेत ट्रक पार्किंग करत असतात. याठिकाणी ट्रक लावण्यासाठी संशयित गेल्या दोन महिन्यांपासून व्हडगे यांचेकडे बारा हजार रुपयांची खंडणी मागत होते.
रविवारी (दि. ११) रात्री ट्रक लावताना संशयितांनी त्यांच्यासह क्लिनर महात या दोघांना खंडणी न दिलेल्या रागातून बेदम मारहाण करीत ट्रक पेटवून देण्याची धमकी दिली.