कोल्हापूरची ‌सिंधुदुर्गवर दणदणीत मात

कोल्हापूर : महाराष्ट्र राज्य क्रिकेट असोसिएशनतर्फे आयोजित केलेल्या १९ वर्षांखालील निमंत्रित क्रिकेट स्पर्धेत अनिकेत नलवडे व स्मित पाटील यांच्या शतकी खेळीमुळे कोल्हापूर जिल्हा संघाने सिंधुदुर्ग जिल्हा क्रिकेट संघाचा तब्बल २२५ धावांनी पराभव केला.

राजाराम काॅलेजच्या मैदानावर सुरू असलेल्या या स्पर्धेत सोमवारी कोल्हापूर व सिंधुदुर्ग जिल्हा संघ यांच्यात एकदिवशीय सामना झाला. प्रथम फलंदाजी करताना कोल्हापूर संघाने ५० षटकांत २ बाद ३३८ धावांचा डोंगर रचला. यात अनिकेत नलवडे याने १३२, तर स्मित पाटील याने १०० धावा केल्या, तर यशवर्धन पाटील याने नाबाद ५८ व हर्षवर्धन जाधव याने नाबाद १३ धावा केल्या. गोलंदाजी करताना सिंधुदुर्गच्या यश गाडेकरला केवळ एक बळी घेता आला. उत्तरादाखल खेळताना सिंधुदुर्ग संघाला हे आव्हान पेलवले नाही. कोल्हापूरकडून क्षितिज पाटील याने चार, प्रथमेश बाजारी व अभिषेक निषाद यांनी प्रत्येकी दोन व तुषार पाटील व श्रेयश चव्हाण याने प्रत्येकी एक बळी घेतला. कोल्हापूर संघाच्या भेदक गोलंदाजीपुढे त्यांचा टिकाव लागला नाही. केवळ यश धाडीने ५५ धावा करीत एकाकी किल्ला लढविण्याचा प्रयत्न केला. त्यास निलंग नाईक याने ११ व तन्मय चिंदरकर याने १० धावा करीत साथ देण्याचा प्रयत्न केला. मात्र, भेदक गोलंदाजी व उत्कृष्ट क्षेत्ररक्षणाच्या जोरावर सिंधुदुर्गचा संघ २५.१ षटकांत सर्वबाद ११३ धावांत गुंडाळला. त्यामुळे हा सामना तब्बल २२५ धावांनी कोल्हापूर संघाने जिंकला. संघाचा हा स्पर्धेतील दुसरा विजय आहे.

फोटो : ०८०३२०२१-कोल-अनिकेत नलवडे

फोटो : ०८०३२०२१-कोल-स्मित पाटील