केएमसी महाविद्यालयातील सुविधांसाठी निधी देणार

लोकमत न्यूज नेटवर्क

कोल्हापूर : महानगरपालिकेच्या केएमसी महाविद्यालयातील शैक्षणिक आणि भौतिक सुविधांसाठी निधी उपलब्ध करून देणार असल्याची माहिती आमदार ऋतुराज पाटील यांनी दिली. महाविद्यालयात आयोजित बैठकीत ते बोलत होते.

आमदार पाटील म्हणाले, महापालिकेच्या माध्यमातून गेली ३८ वर्ष हे महाविद्यालय सुरू आहे. अत्यंत अल्प शुल्कामध्ये या महाविद्यालयाने बहुजन समाजातील विद्यार्थ्यांना चांगले शिक्षण उपलब्ध करून दिले आहे. या महाविद्यालयात शिकणाऱ्या विद्यार्थ्यांना चांगल्या सुविधा देण्यासाठी प्रयत्न करणार आहे. पालकमंत्री सतेज पाटील , आमदार चंद्रकांत जाधव यांचीसुद्धा यासाठी मदत घेणार आहे.

प्राचार्य प्रशांत नागावकर म्हणाले, नॅक समितीने पुनर्मूल्यांकन करताना महाविद्यालयात चांगल्या सुविधा असाव्यात, अशा सूचना केल्या. त्यानुसार अद्ययावत संगणक लॅब, जनरेटर, सीसीटीव्ही, सौरऊर्जा प्रकल्प, मॉडर्न क्लासरूम, संरक्षक भिंत दुरुस्ती, सुशोभिकरण, ग्रंथालय आधुनिकीकरण या सुविधा उपलब्ध होणे गरजेचे आहे.

यावेळी उपायुक्त रविकांत आडसुळ, माजी नगरसेवक प्रतापसिंह जाधव, किरण भोसले, प्रा. जे. एम. शिवणकर, प्रा. एस. एम. शेख, पी. डी. तोरस्कर, प्रा. एस. पी. कांबळे, प्रा. रेडेकर आदी उपस्थित होते.

फोटो : ०३०४२०२१-कोल-केएमसी भेट

कोल्हापूर दक्षिणचे आमदार ऋतुराज पाटील यांनी शनिवारी केएमसी महाविद्यालयाला सदिच्छा भेट देत महाविद्यालयाच्या प्रश्नांची माहिती करून घेतली.