सोलापूरजवळ अपघातात किर्लोस्करवाडीचे दोघे ठार

तीन वाहनांचा अपघात : आणखी दोघे सोलापूरचे

कुरुल : सोलापूर-मंगळवेढा या राज्य रस्त्यावरील कामती बुद्रुक गावाजवळ गुरूवारी (दि़ २५) रात्री अकराच्या सुमारास तीन वाहनांची धडक होऊन आयशर टेम्पोतील बॅटरीच्या स्पार्कमुळे पेटलेल्या आगीत चार जणांचा जागीच होरपळून मृत्यू झाला़ यात आणखी एक जण गंभीररीत्या जखमी झाल्याची माहिती पोलिसांनी दिली़
या भीषण अपघातात आयशर टेम्पोतील यासीन इकबाल नदाफ (वय २६, रा़ किर्लोस्करवाडी, ता़ पलूस, जि़ सांगली), रमजान तुराबुद्दीन चौगुले (रा़ रामानंदनगर, किर्लोस्करवाडी), पिकअपमधील दरेप्पा ईश्वरप्पा हत्ताळी (वय २७, रा़ हुलजंती, ता़ मंगळवेढा) अशा तिघांचा जागीच होरपळून मृत्यू झाला तर टिपरचा चालक सोमनाथ भीमशा कोडके (वय ३८) व पिकअपमधील समाधान दिगंबर भोपळे हे दोघे गंभीर जखमी झाल्याने त्यांना उपचारासाठी सोलापूर येथे हलविण्यात आले होते़ तेथे उपचारादरम्यान टिपरचालक सोमनाथ कोडके याचा मृत्यू झाला़
या अपघातासंदर्भात कामती पोलिसांनी दिलेल्या माहितीनुसार, गुरूवारी रात्री अकराच्या सुमारास पिकअप (क्रमांक एमएच १३ ए़एऩ ४११५) वाहन सोलापूर मार्केटमध्ये डाळिंब उतरवून मंगळवेढ्याकडे निघाले होते़ तर सांगलीकडून द्राक्ष भरून आयशर टेम्पो (क्ऱ एमएच १४ सीपी ५७४८) सोलापूरकडे निघाला होता़ कामतीजवळ खराडे वस्तीनजीक आल्यानंतर आयशर टेम्पो चालकाचा ताबा निसटल्याने त्याने पिकअपला समोरून जोराची धडक दिली़ या धडकेने पिकअप वाहन ५ ते १० फूट फेकले गेले़ याचवेळी सोलापूरहून वाळू वाहतूक करणारा हायवा टिपर (क्र. एमएच १३ एएक्स ३५७८) च्या चालकास काहीच अंदाज न आल्याने टिपर-आयशर टेम्पोची जोरात धडक बसली़
दरम्यान, या जोराच्या धडकेने आयशर टेम्पोतील बॅटरीने पेट घेतल्याने ठिणगी पडली़ या ठिणगीचे रुपांतर टेम्पोत पॅकिंग द्राक्षासाठी असलेल्या कागदाने घेतला़ त्यामुळे आगीने रुद्ररूप धारण केले़ जवळपासच्या वस्तीवरील लोकांनी पोलीस स्टेशनला कळविल्यानंतर तत्काळ सहायक पोलीस निरीक्षक संजीव झाडे व इतर पोलीस कर्मचाऱ्यांनी घटनास्थळी धाव घेतली़ गांभीर्य लक्षात घेऊन तत्काळ भीमा साखर कारखाना व सोलापूर महानगरपालिकेच्या अग्निशामक दलाने शर्थीचे प्रयत्न करून आग आटोक्यात आणली़
या घटनेची माहिती मिळताच उपविभागीय पोलीस अधिकारी अभय डोंगरे, सपोनि संजीव झाडे, पोकॉ हांडे, वाकडे, कांबळे, सलबत्ते, चमके, बोधवड, मोरे, गायकवाड, शिवसेना तालुका उपप्रमुख अशोक भोसले आदींनी घटनास्थळी भेट दिली़