भोंदूबाबाकडून चार लाख किमतीचे दागिने जप्त

अब्दुललाट (ता. शिरोळ) येथे करणी काढण्याचे सांगून रोख रकमेसह सोन्याचे दागिने अशा सुमारे पावणेतीन लाखांची फसवणूक केल्याप्रकरणी अटकेत असलेला संशयित आरोपी पृथ्वीराज यशवंत जाधव (रा. मिरज) याच्याकडून कुरुंदवाड पोलिसांनी साडे आठ तोळ्याचे (अंदाजे किंमत चार लाख) दागिने जप्त केली. फसवणिकीची फिर्याद जोत्सा उत्तम पालकर (रा. अब्दुललाट) या महिलेने दिली होती.

पोलिसांतून मिळालेल्या माहितीनुसार, संशयित आरोपी जाधव याने फिर्यादी पालकर व त्यांच्या आई मंगल यांना घरात कोणीतरी करणी केल्याचे सांगून व त्याला बंधन करण्यासाठी फिर्यादी व त्यांच्या आईकडून वेळोवेळी १ लाख ३५ हजार रुपये रोख व १ लाख ३४ हजार रुपयांचे दागिने फसवून घेतले होते. बंधन निघताच सोने परत करण्याचा विश्वास दिला होता. वर्ष उलटले तरी सोने व पैसे परत न केल्याने फिर्यादिने कुरुंदवाड पोलिसांत फिर्याद दिली होती. त्यामुळे पोलिसांनी त्याला मिरजेतून अटक केली होती. करणीच्या नावावर अंधश्रद्धेतून फसवणूक झाल्याने तालुक्यात खळबळ उडाली होती.

इंचलकरंजी विभागाचे उपविभागीय पोलीस अधिकारी बाबूराव महामुणी यांच्या मार्गदर्शनाखाली पोलीस निरीक्षक चंद्रकांत निरावडे यांच्या पथकाने ही कारवाई केली. पथकात पोलीस उपनिरीक्षक अमित पाटील, पोलीस कॉन्स्टेबल अविनाश मुंगसे, अमित प्रधाने, सागर खाडे यांचा समावेश होता.

फोटो - अब्दुललाट ता. शिरोळ येथे करणीची भीती घालून फसवणूक केलेला संशयित आरोपी पृथ्वीराज जाधव याच्यासह त्याच्याकडून जप्त करण्यात आलेले सोन्याचे दागिने. यावेळी पोलीस निरीक्षक चंद्रकांत निरावडे, उपनिरीक्षक अमित पाटील आदी.