पाइपलाइनद्वारे स्वस्त गॅस मिळणे शक्य

लोकमत न्यूज नेटवर्क

कोल्हापूर : कोल्हापूरच्या विकासात भर घालणाऱ्या गॅस पाइपलाइन प्रकल्पामुळे शहरवासीयांना स्वस्त दरात घरगुती गॅस मिळणे शक्य होईल, असा विश्वास खासदार संभाजीराजे छत्रपती यांनी मंगळवारी येथे बोलताना व्यक्त केला.

शहरातील ई-वॉर्ड परिसरात कदमवाडी -विजयनगर येथे गॅस पाइपलाइन टाकण्यात येत असून, त्याचा प्रारंभ मंगळवारी खासदार संभाजीराजे छत्रपती व भाजपचे प्रदेशाध्यक्ष चंद्रकांत पाटील यांच्या हस्ते झाला, त्यावेळी ते बोलत होते. कोरोनाच्या सर्व प्रतिबंधक नियमांचे पालन करीत हा कार्यक्रम झाला.

खासदार संभाजीराजे म्हणाले, अनेक वर्षांपासून मी या योजनेचा पाठपुरावा करीत आहे. त्याच्या प्रत्यक्ष कामाला सुरुवात झाली. महानगरपालिकेच्या सर्व परवानग्या मिळाल्या असल्याने हा प्रकल्प लवकरच पूर्ण होईल. दिल्ली, मुंबई, पुण्यासारख्या शहरांत यशस्वी ठरलेली ही योजना कोल्हापूरच्या विकासातही अमूल्य योगदान देईल. शहरातील प्रत्येक कुटुंबाला या प्रकल्पाचा थेट लाभ होणार आहे. आज जर एक सिलिंडर ८०० रुपयांना मिळत असेल, तर तेवढाच गॅस आपल्याला ४०० ते ४५० रुपयांत मिळेल. जेवढा वापर तेवढेच पैसे आकारले जातील. गृहिणींना यामुळे मोठा दिलासा मिळणार आहे. हॉटेल व्यावसायिक व अनेक उद्योगांना यामुळे स्वस्त इंधन मिळेल. किफायतशीर आणि स्वच्छ इंधनाचा भरपूर पुरवठा झाल्याने उद्योगवाढीसाठी याचा अतिरिक्त फायदा होणार आहे.

आमदार चंद्रकांत पाटील म्हणाले, गॅस हवेपेक्षाही हलका असल्याने तो उडून जातो. चुकून लीक झाला तरी त्याचा स्फोट होत नाही. आपण अनेक वेळा पाहतो सिलिंडरचा अपघात होतो. सुरक्षेच्या दृष्टिकोनातूनही सिलिंडरपेक्षा अत्यंत सुरक्षित आहे, याचा स्फोट होण्याची शक्यता नसते. गॅस मिळण्यातील अडचणी दूर होणार आहेत.

प्रकल्प प्रमुख बी.एस. सोनवणे यांनी गॅस पुरवठा विनाखंड चोवीस तास सुरू ठेवला जाणार असल्याचे सांगितले. यावेळी माजी नगरसेवक सत्यजित कदम, संभाजी जाधव उपस्थित होते.

संपूर्ण शहरात पाइपलाइन टाकणार-

पहिल्या टप्प्यात ई-वॉर्डातील १० प्रभागांत पाइपलाइन टाकण्यात येत असून, पुढील टप्प्यात संपूर्ण शहरात ती टाकली जाईल. त्यानंतर जिल्ह्याच्या ग्रामीण भागातही पोहोचविण्याचा माझा प्रयत्न असल्याचे संभाजीराजे यांनी सांगितले.

(फोटो देत आहे)