परीक्षार्थी विद्यार्थी कोरोनाबाधित न होणे हे मोठे यश

कोल्हापूर : सर्वोच्च न्यायालयाने आदेश दिल्यानंतर पर्याय नसल्याने महाविद्यालयीन परीक्षा घेण्यात आल्या. मात्र, साडेतीन लाख परीक्षार्थी आठवेळा केंद्रावर आले; परंतु यातील कोणाही विद्यार्थ्यांना कोरोना झाला नाही हे महाविकास आघाडीचे मोठे यश आहे, असा दावा उच्च व तंत्रशिक्षण मंत्री उदय सामंत यांनी केला.

येथील सायबर महाविद्यालयातील डेटा सेंटर आणि राधाबाई ग्लोबल इंग्लिश स्कूलच्या इमारत उद्घाटनप्रसंगी ते बोलत होते.

सामंत म्हणाले, ६ एप्रिल २० रोजी विद्यापीठ अनुदान आयोगाने परीक्षा घेऊ नका, असे पत्र दिले. मी मुख्यमंत्री उद्धव ठाकरे यांच्याशी चर्चा केली. प्रसंगी पक्षीय नुकसान झाले तरी चालेल; परंतु पालक, विद्यार्थी, शिक्षक या सर्वांच्या भावना समजून निर्णय घ्या, अशा सूचना त्यांनी दिल्या. परीक्षा रद्द करण्याचा निर्णय घेतला. मंत्री आपल्या दारी उपक्रमांर्तगत अनुकंपा योजनेची अंमलबजावणी न करणाऱ्या अधिकाऱ्यांना घरी पाठवू म्हणून इशारा दिला. महाविद्यालयाला आवश्यक तो निधी दिला जाईल आणि पाच वर्षे आम्ही राहणार असल्याने त्याची काळजी करू नका.

आमदार जयंत आसगावकर म्हणाले, महाराष्ट्रातील वाणिज्य आणि व्यवस्थापनातील एक नामवंत शिक्षण संस्था म्हणून सायबरचा उल्लेख केला जातो. याचा आम्हांला अभिमान आहे. डॉ. टी. ए. शिवारे यांनी संस्थेचा परिचय करून दिला.

श्रीपतराव शिंदे म्हणाले, आमचे वडील दिनकर मास्तर यांनी किमान ग्रामीण भागातील मुलांना प्राथमिक शिक्षण मिळावे म्हणून शाळा सुरू केल्या, तर बंधू ए. डी. शिंदे यांनी वाणिज्य विषयातील शिक्षण देण्यासाठी ही संस्था सुरू केली.

संस्थेचे सचिव डॉ. आर. ए. शिंदे यांनी आभार मानले. डॉ. सी. एस. दळवी यांनी स्वागत केले. यावेळी विश्वस्त ऋषिकेश शिंदे, मुंबई विद्यापीठाचे माजी कुलगुरू डॉ. विजय कोले, यशवंतराव चव्हाण मुक्त विद्यापीठाचे माजी कुलगुरू डॉ. बी. पी. साबळे, सूर्यकांत पाटील-बुदिहाळकर, ॲड. सुरेश कुराडे, डॉ. ए. आर. कुलकर्णी, अनुजा वणकुद्रे उपस्थित होत्या. डॉ. एस. एस. आपटे, अनुराधा गायकवाड यांनी सूत्रसंचालन केले.

चौकट

परीक्षा रद्द करणारा मंत्री

गेल्यावर्षी युवक वर्गात माझी लोकप्रियता खूपच वाढली. दौऱ्यावर असताना अनेक युवक भेटायला यायचे. तुम्ही परीक्षा रद्द करून चांगला निर्णय घेतल्याबद्दल अभिनंदन करायचे. परीक्षा रद्द करणारा मंत्री म्हणून माझी प्रतिमा करू नका, असे मी त्यांना सांगायचो. कारण यापुढे परीक्षा होणारच आहेत. मात्र, त्या ऑफलाईन की ऑनलाईन याचा निर्णय विद्यार्थ्यांनी घ्यावयाचा आहे.

२००२२०२१ कोल सायबर

कोल्हापुरातील सायबरच्या राधाबाई इंग्लिश मेडियम स्कूलच्या इमारतीचे उद्घाटन उच्च व तंत्रशिक्षण मंत्री उदय सामंत यांच्या हस्ते शनिवारी झाले. यावेळी डावीकडून ऋषिकेश शिंदे, श्रीपतराव शिंदे, आमदार जयंत आसगावकर, डॉ. टी. ए. शिवारे, सूर्यकांत पाटील-बुदिहाळकर, डॉ. आर. ए. शिंदे, ॲड. सुरेश कुराडे, डॉ. सी. एस. दळवी उपस्थित होते. छाया.. आदित्य वेल्हाळ