आडूरमध्ये कोरोना योद्ध्यांना दीड लाखाचे विमा कवच

कोपार्डे : आडूरमध्ये कोरोना महामारीत अखंडित काम करणाऱ्या गावातील कोरोना योद्ध्यांना कोणतेही शासकीय विमा कवच नाही. कोरोना महामारीमध्ये आपल्या जिवाची पर्वा न करता, राबणारे ग्रामपंचायत कर्मचारी, अंगणवाडी सेविका, आशा सेविका, मदतनीस अशा १२ लोकांना दीड लाखापर्यंत विमा कवच देणारी पॉलिसी येथील समाजसेवक राजू मुल्लानी यांनी रविवारी प्रदान केली.

यावेळी राजू मुल्लानी म्हणाले, गेली दोन वर्षे आडूळ गावातील अंगणवाडी सेविका, ग्रामपंचायत कर्मचारी, आशा सेविका, मदतनीस हे आपल्या जीवाची पर्वा न करता, कोरोना महामारीविरोधात काम करत आहेत. यावेळी या कर्मचाऱ्यांना प्रसंगी ग्रामस्थांकडून अपमानास्पद वागणूक दिली जाते. मात्र, अशा गंभीर परिस्थितीतही आपल्या कुटुंबाचा विचार न करता हे कोरोना योद्धे शासनाला मदत करत आहेत. त्यातच एखादा कर्मचारी कोरोनाग्रस्त झाला तर त्याला आर्थिक व मानसिक त्रास सहन करावा लागतो. यासाठी सामाजिक बांधिलकी समजून आडूर येथील १२ कोरोना योद्ध्यांना दीड लाखापर्यंत संरक्षण देणारे विमा कवच दिले आहे.

सरपंच भगवान भोसले यांनी राजू मुल्लानी यांचे कौतुक केले. यावेळी ग्राम दक्षता समितीच्या अध्यक्ष पोलीसपाटील सरिता पोवार, सदस्य सुशीला माने, महादेव सुतार, जयवंत चौगले, बाजीराव पाटील, संतोष कांबळे, कमल निरुके उपस्थित होते. ग्रामसेविका गीतांजली वाईंगडे यांनी आभार मानले.

३० आडूर विमा कवच

फोटो - आडूर येथील कोरोना योद्ध्यांना दीड लाखापर्यंतच्या विमा संरक्षणाची पॉलिसी राजू मुल्लानी यांनी प्रदान केली. यावेळी सरपंच भगवान भोसले, ग्रामसेविका गीतांजली वाईंगडे उपस्थित होत्या.