ऑक्सिजन निर्मितीच्या ठिकाणी विद्युत जनरेटर बसवा

कोल्हापूर : राधानगरी, मुरगूड, मलकापूर, कोडोली, सीपीआर, आयजीएम या ठिकाणी ऑक्सिजन निर्मिती तसेच उपजिल्हा रुग्णालय गडहिंग्लज येथे रिफिलिंग प्रकल्प बसविण्यात येत आहे. या ठिकाणी विद्युत जनरेटर बसवावेत, येथील ट्रान्सफॉर्मरची क्षमता तपासून आवश्यकतेप्रमाणे ते बदलावेत, अशा सूचना पालकमंत्री सतेज पाटील यांनी सोमवारी केल्या.

जिल्हाधिकारी कार्यालयात झालेल्या कोरोना आढावा बैठकीत ते बोलत होते. यावेळी आमदार जयंत आसगावकर, जिल्हाधिकारी दौलत देसाई व कोल्हापूर मेडिकल असोसिएशनचे पदाधिकारी उपस्थित होते. यावेळी त्यांनी मागील वर्षाप्रमाणेच याही वर्षी सर्वांनी नियंत्रण कक्षासाठी सेवा द्यावी, त्याबाबत तीन सत्रात नियोजन करावे, असे आवाहन केले.

जिल्हाधिकारी दौलत देसाई यांनी शिवाजी विद्यापीठ येथील कोविड रुग्णालयात टास्क फोर्सने सेवा द्यावी, गृह विलगीकरणातील रुग्णांना रुग्णालयांनी सेवा पुरवावी. तसेच ऑक्सिजन कॉन्सेंट्रेटर खरेदी करावे, अशी सूचना केली.

यावेळी असोसिएशनच्या पदाधिकाऱ्यांनी शहरातील कोविड रुग्णालयात गरजूंना बेड उपलब्ध करून देण्यासाठी वैद्यकीय भरारी पथकामार्फत रुग्णालयाला भेट देऊन व्यवस्थापनाचे समुपदेशन करण्यात येणार आहे. ज्याला बेडची गरज नाही, अशा रुग्णांची हॉटेलमध्ये व्यवस्था करून त्यांच्यावर रुग्णालयामार्फत उपचार करण्यात येतील, असे सांगितले.

बैठकीला सार्वजनिक बांधकाम विभागाचे कार्यकारी अभियंता संजय सोनवणे, कोल्हापूर मेडिकल असोसिएशनच्या अध्यक्षा डॉ. आशा जाधव, उपाध्यक्ष डॉ. गीता पिल्लई, सचिव डॉ. किरण दोशी, सल्लागार डॉ. रवींद्र शिंदे, डॉ. नीता नरके, डॉ. राजेंद्र वायचळ, डॉ. अमर आडके, डॉ. शीतल देसाई, डॉ. शीतल पाटील, डॉ. मुकुंद मोकाशी उपस्थित होते.

---

फोटो नं २६०४२०२१-कोल-पालकमंत्री बैठक

ओळ : कोल्हापुरातील जिल्हाधिकारी कार्यालयात सोमवारी पालकमंत्री सतेज पाटील यांनी कोल्हापूर मेडिकल असोसिएशनच्या पदाधिकाऱ्यांना ऑक्सिजन निर्मिती व कोरोना रुग्णांना सेवा-सुविधा याबाबत सूचना केल्या. यावेळी जिल्हाधिकारी दौलत देसाई उपस्थित होते.

--