राधानगरीत फुलपाखरू महोत्सव उद्घाटन

: राधानगरी दाजीपूर अभयारण्याच्या पर्यटन विकास आराखड्याला राज्य शासनाची मंजुरी मिळाल्याने राधानगरी अभयारण्य हे आंतरराष्ट्रीय पर्यटन स्थळ बनेल, असे प्रतिपादन खासदार संजय मंडलिक यांनी केले. बायसन नेचर क्लब आणि वन्यजीव विभाग यांच्या वतीने राधानगरीत आयोजित फुलपाखरू महोत्सव उद्घाटन प्रसंगी ते बोलत होते.

आमदार प्रकाश आबिटकर म्हणाले, राधानगरी अभयारण्याचे निसर्गसौंदर्य जागतिक दर्जाचे आहे. त्याचे संवर्धन करूनच विकास प्रकल्प राबविण्यात येतील. येथे होणारे विविध पर्यावरण कार्यक्रम पर्यटनाला चालना देणारे आहेत. अभयारण्याचे वैविधतेची योग्य पद्धतीने मांडणी करून त्याचे ऐतिहासिक महत्त्व राज्याचे मुख्यमंत्री उद्धव ठाकरे यांना पटवून दिल्याने अभयारण्याच्या पर्यटनदृष्ट्या विकासासाठी त्यांनी तब्बल ११० कोटींचा निधी मंजूर केला आहे. माजी शिक्षण सभापती अभिजित तायशेटे यांनी स्वागत व प्रास्ताविक केले. सह्याद्री व्याघ्र वनसंरक्षक तथा क्षेत्र संचालक समाधान चव्हाण, वन्यजीवचे विभागीय अधिकारी विशाल माळी, राज्य वन्यजीव समिती सदस्य सुहास वायंगणकर, वास्तुविशारद अमरजा निंबाळकर, फुलपाखरू अभ्यासक सुनील करकरे, वन क्षेत्रपाल नवनाथ कांबळे, नामदेव पाटील, सरपंच कविता शेट्टी, उपसरपंच मिथुन पारकर, नंदकिशोर सूर्यवंशी, प्रा. सुरेश कुऱ्हाडे, सम्राट केरकर, रुपेश बोंबडे, अमरेंद्र मिसाळ यांच्यासह पर्यावरण प्रेमी व अभ्यासक, ग्रामस्थ उपस्थित होते. दयानंद सावर्डेकर यांनी आभार मानले. यावेळी फुलपाखरू अभ्यासक सुनील करकरे यांच्या राधानगरी अभयारण्यातील फुलपाखरे या पुस्तकाचे प्रकाशन खासदार संजय मंडलिक, आमदार प्रकाश आबिटकर यांच्या हस्ते करण्यात आले.