'ग्रेमॅक्स'ला जागा दिली तर जनआंदोलन

गडहिंग्लज : गडहिंग्लज परिसराच्या औद्योगिकरणाचा खेळखंडोबा केलेल्या 'ग्रेमॅक्स'ला पुन्हा जागा दिली, तर जनआंदोलन उभारून कंपनीला हद्दपार करण्यात येईल, असा इशारा जनता दलातर्फे उद्योगमंत्री सुभाष देसाई यांना पाठविलेल्या निवेदनातून देण्यात आला आहे.

जनता दलाचे तालुकाध्यक्ष बाळेश नाईक व सहकाऱ्यांनी शिष्टमंडळाने भेटून येथील प्रांताधिकारी विजया पांगारकर यांना हे निवेदन दिले.

ग्रामविकासमंत्री हसन मुश्रीफ, पालकमंत्री सतेज पाटील, आमदार राजेश पाटील व जिल्हाधिकारी यांनाही हे निवेदन पाठविण्यात आले आहे. निवेदनात म्हटले आहे की, ग्रेमॅक्स कंपनीबद्दल जनतेत प्रचंड असंतोष असल्यामुळे 'ग्रेमॅक्स'ला अजिबात जागा देऊ नये, त्याऐवजी ती जागा सूक्ष्म, लघु व मध्यम उद्योजकांना वाटप करावी. त्यातूनच गडहिंग्लज विभागाच्या औद्योगिक विकासाला चालना मिळण्यास मदत होईल.

निवेदनावर, नगराध्यक्षा प्रा. स्वाती कोरी, जनता दलाचे कार्याध्यक्ष उदय कदम, नगरसेवक बसवराज खणगावे, नरेंद्र भद्रापूर, नितीन देसाई, सुनीता पाटील, क्रांतिदेवी शिवणे व वीणा कापसे, राजेंद्र भुईंबर, गंगाराम विभुते, सलीम नदाफ आदींच्या स्वाक्षऱ्या आहेत.

फोटो ओळी :

गडहिंग्लजच्या प्रांताधिकारी विजया पांगारकर यांना जनता दलाचे तालुकाध्यक्ष बाळेश नाईक यांनी निवेदन दिले. यावेळी उदय कदम, राजेंद्र भुईंबर, गंगाराम विभुते आदी उपस्थित होते.

क्रमांक : ०७०७२०२१-गड-०६