इचलकरंजीत गौराईचे साहित्य खरेदीसाठी लगबग

इचलकरंजी : लाडक्या गणरायाचे शुक्रवारी सर्वत्र वाजतगाजत आगमन झाले, असून रविवारी १२ सप्टेंबर रोजी गौरींचे घरोघरी आगमन होणार आहे. या पार्श्वभूमीवर गौरींचे मुखवटे, साड्या, दागदागिने, सजावटीचे साहित्य यासह वैविध्यपूर्ण साहित्याच्या खरेदीसाठी बाजारपेठेत लगबग सुरू होती.

गणरायाच्या आगमनानंतर घरोघरी वेध लागतात ते गौरी आगमनाचे. यंदा रविवारी गौरींचे आगमन होणार असून घरोघरी त्यांच्या स्वागतासाठी जय्यत तयारी सुरू झाली आहे. या उत्सवाच्या निमित्ताने सजावटीसाठी लागणारे साहित्य, गौरींचे मुखवटे, साडी-चोळी, साजशृंगाराच्या साहित्याची खरेदी करण्यासाठी बाजारात गर्दी आहे. मागील वर्षीच्या तुलनेत यंदा सजावट साहित्य, मुखवटे यांच्या किमतीमध्ये काही प्रमाणात वाढ झाली आहे. गौरींचे चारशे रुपयांपासून पाच हजारांपर्यंत विविध प्रकारचे व आकारात मुखवटे बाजारात उपलब्ध आहेत. मुखवटे खरेदीसोबतच मंगळसूत्र, बांगड्या, नथ, मोत्याच्या माळा, जोडवी अशा पारंपरिक दागिन्यांसह विविध दागिन्यांची खरेदी करण्यास पसंती मिळत आहे. गौरींचे रविवारी आगमन होणार असून सोमवारी १३ सप्टेंबर रोजी घरोघरी पारंपरिक पद्धतीने पूजाअर्चा करून पुरणपोळीसह विविध पदार्थांचा नैवेद्य गौरींना दाखविण्यात येणार आहे. गौरींना नैवेद्य दाखवताना बटाटा, भेंडी, गवार, आळू, मुळा, वाटाणा, ढोबळी मिरची, कोबी, फ्लॉवर, घोसाळे, पालक अशा विविध सोळा प्रकारच्या भाज्यांचा समावेश केला जातो.

महापुरामुळे पुरवठा व किमतींवर परिणाम

यंदाच्या महापुरामुळे शेतातील अनेक पिके वाहून गेली आहेत. त्यामुळे यावर्षी गौरींसाठी लागणाऱ्या साहित्याचे पाण्यामुळे खूप नुकसान झाले आहे. याचा परिणाम म्हणजे हे साहित्य मुबलक प्रमाणात उपलब्ध झाले नाही. पुरवठा कमी असल्याने मागील वर्षीपेक्षा अधिक किमतीने साहित्याची विक्री सुरू आहे.

फोटो ओळी

इचलकरंजी : गौराईचे आगमन होणार असल्याने साहित्य व मुखवटे यांची खरेदी करताना महिला.