भुदरगड पोलिसांच्या माणुसकीचे दर्शन

करडवाडी ता. भुदरगड येथील होमगार्ड तानाजी शामराव बेलेकर यांना ३९००० ची आर्थिक मदत देऊन सामाजिक बांधिलकी जपली आहे. वडिलांचे छत्र हरवलेले करडवाडी येथील तानाजी बेलेकर हे होमगार्डमध्ये सेवा बजावून आपला चरितार्थ चालवत होते. नुकत्याच झालेल्या ग्रामपंचायत निवडणुकीदरम्यान सेवा बजावत असताना गारगोटी-शेणगावदरम्यान रस्त्यावर गाडी घसरून त्यांचा अपघात झाला होता. अपघातात पायाला मार लागल्याने त्यांच्यावर खासगी रुग्णालयात उपचार करण्यात आले होते. त्यांच्या परिस्थितीचा विचार करून पोलीस व होमगार्ड कर्मचाऱ्यांनी आर्थिक हातभार लावल्याने यांच्या कुटुंबियांना खाकीचा मोठा आधार लाभला आहे.

भुदरगड ठाण्याचे पोलीस निरीक्षक के. एन. पाटील, पी. एस. आय. सतीश मयेकर, पोलीस उपनिरीक्षक अमित देशमुख आदींनी पुढाकार घेऊन संपूर्ण स्टाफच्यावतीने ३९००० रुपयांची देणगी पोलीस तुकाराम सूर्यवंशी, संजय मेटकर, रवींद्र पाटील, अमोल मोरे, परदेशी करवळ यांनी सुपूर्द केली.

भुदरगड पोलीस प्रशासनाने वर्गणी जमा करून एका गरिबाचे हात बळकट केले आहेत, हा उपक्रम कौतुकास्‍पद आहे, असे महाराष्ट्र पोलीस बॉईज संघटनेचे तालुकाध्यक्ष प्रकाश खतकर म्हणाले.