कोल्हापूर : ताराराणी चौकातील अयोध्या पार्क येथील हेवन पिझ्झा अॅँड कॅफे या हॉटेलला गुरुवारी सकाळी शॉर्ट सर्किटमुळे लागलेली आग अग्निशमन दलाने १५ मिनिटांत विझविली.
याबाबत अग्निशमन दलाकडून मिळालेल्या माहितीनुसार वर्दळीच्या ठिकाणी असलेल्या या हॉटेलमधील ओव्हन व अन्य इलेक्ट्रिक साहित्याला शॉर्ट सर्किटमुळे गुरुवारी सकाळी आग लागली. त्याची वर्दी मालक संगीता पुरोहित यांनी अग्निशमन दलाला देताच तत्काळ तीन बंब या ठिकाणी आले.
सकाळची वेळ असल्याने हॉटेलमध्ये गर्दी होती. आतमध्ये आग लागल्याचे कळताच सर्व ग्राहक व कर्मचारी तत्काळ हॉटेलबाहेर पडले. अग्निशमन दलाच्या जवानांनी तत्काळ पावले उचलीत ही आग १५ मिनिटांत विझविली. त्यामुळे अनर्थ टळला.
आतमध्ये मोठ्या प्रमाणात साठलेला धूर अग्निशमन दलाच्या जवानांनी ब्लोअरद्वारे बाहेर काढला. यावेळी स्थानक अधिकारी कांता बांदेकर, उमेश जगताप, वामन चोरे, मेहबूब जमादार, चंद्रकांत पाटील, पवन कांबळे, कपिल यादव, सुशांत जोंधळे, उमाजी निकम, आदींनी ही आग विझविण्यास साहाय्य केले.