मराठा मूकआंदोलन पार्श्वभूृमीवर अवजड वाहतुकीला शहरात प्रवेश बंद

कोल्हापूर : सकल मराठा समाजास आरक्षण मिळावे यासाठी खासदार संभाजीराजे यांच्या नेतृत्वाखाली राजर्षी छत्रपती शाहू महाराज समाधीस्थळी आज बुधवारी मूकआंदोलन होत आहे. त्या पार्श्वभूमीवर कोल्हापूर शहरात आंदोलनाच्या ठिकाणी गर्दी होऊ नये तसेच वाहनधारकांना त्रास होऊ नये यासाठी शहरात जड अवजड वाहनांना प्रवेश बंद करण्यात आला आहे. तसेच शहरातील काही मार्गावर तात्पुरता प्रवेश बंद तर पर्यायी मार्ग देण्यात आले आहेत.

जड-अवजड वाहनांसाठी...

- रत्नागिरी मार्गावरून शहरात येणा-या सर्व अवजड वाहनांना वडणगे फाटा येथे प्रवेश बंद केला आहे. तेथून अवजड वाहनांना वडणगे, निगवे, शियेमार्गे राष्ट्रीय महामार्गाकडे मार्गस्थ व्हावे.

- गगनबावडा कडून येणा-या वाहनांना फुलेवाडी जकात नाका येथे आडवून रिंगरोडमार्गे पुढे मार्गस्थ केले.

- राष्ट्रीय महामार्गावरून तावडे हॉटेलमार्गे रत्नागिरीला जाणा-या वाहनांना शहरात ताराराणी चौकात प्रवेश बंद ठेवून धैर्यप्रसाद चौक, सर्किट हाऊस, कसबा बावडा, शिये, भुये, निगवे मार्गे मार्गस्थ.

कसबा बावडाकडून शहरात येणारे व पुढे राधानगरी, गगनबावडाकडे जाणारे वाहने डीएसपी ऑफिस चौकातून पितळी गणपती, धैर्यप्रसाद मार्गे ताराराणी चौक, रिंगरोडमार्गे पुढे मार्गस्थ.

- राधानगरीकडून वाहनांना क्रशर चौक, प्रवेश बंद असून त्यांना संभाजीनगर मार्गे मार्गस्थ व्हावे.

याशिवाय दुचाकी व चारचाकी वाहनांसाठी राजर्षी छत्रपती शाहू महाराज समाधीस्थळाकडे येणारे सर्व मार्ग बंद करून ती वाहतूक इतर मार्गावरून वळवली आहे. ही वाहने दसरा चौक, सोन्या मारुती मंदिरानजीक, सीपीआर येथे बंद करून पर्यायी मार्गाने वळवली आहेत.

पार्किंग व्यवस्था...

ब्रम्हपुरी चर्चचे मैदान, पंचगंगा नदी घाट परिसर, एस्तर पॅटर्न हायस्कूल मैदान, लक्ष्मी क्लब मैदान (दसरा चौक), चित्रदुर्ग मठ, सासने मैदान, व्हिनस कॉर्नर येथे गाडी अड्डा, आर्यर्विन ख्रिश्चन मैदान, खराडे महाविद्यालय, प्रायव्हेट हायस्कूल मैदान येथे पार्किंग व्यवस्था केली आहे.