अशोकराव माने हॉस्पिटलच्यावतीने आरोग्य शिबिर

नवे पारगाव : अशोकराव माने आयुर्वेदिक हॉस्पिटल, वाठार यांच्यातर्फे पाडळी, अंबपवाडी, कासारवाडी या गावात मोफत आरोग्य तपासणी शिबिर घेण्यात आले. या शिबिराला चांगला प्रतिसाद मिळाला असून, एकूण ८०० जणांची आरोग्य तपासणी करण्यात आली.

यावेळी रक्तदाब, मधुमेह, अस्थीरोग, आम्लपित्त, त्वचारोग, दमा, मूळव्याध, भगंदर, मुतखडा आदींसह स्त्रीरोग, लहान मुलांची आरोग्य तपासणी करण्यात आली तसेच कोरोनाची काळजी घेण्याविषयी मार्गदर्शन करण्यात आले. तज्ज्ञ डॉक्टरांनी ही तपासणी केली. पाडळी येथे सरपंच डॉ. विभा पाटील यांच्या हस्ते व जिल्हा परिषद सदस्य मनीषा माने यांच्या प्रमुख उपस्थितीत या शिबिराचे उद्घाटन झाले.

यावेळी सरपंच डॉ. विभा पाटील म्हणाल्या, अशोकराव माने यांनी ग्रामीण भागाच्या विकासासाठी व्यापक विधायक कार्य केले. उच्च शिक्षणाची सोय उपलब्ध करून दिली. त्यांच्या विचारांचा, कार्याचा वारसा माने कुटुंबीय नेटाने चालवत आहे. सामाजिक जबाबदारीची जाणीव ठेवून आरोग्यविषयक कार्य त्यांनी हाती घेतले आहे. आरोग्यविषयक सोयी-सुविधा निर्माण करण्याचा त्यांचा प्रयत्न कौतुकास्पद आहे. गोरगरीब, गरजू लोकांना या शिबिराचा उपयोग झाला असून, माने हॉस्पिटल लोकांची काळजी घेणारे केंद्र बनले आहे.

यावेळी प्रकाश पाटील, रवींद्र पाटील, व्ही. बी. पाटील, धनाजी देसाई, अजित पाटील, श्रीधर पाटील, उदय पाटील, दिनकर पाटील, नितीन पाटील, महंमद पठाण, पद्मा पाटील उपस्थित होते. अंबपवाडी येथे सरपंच पार्वती नाईक, कासारवाडी येथे शोभाताई खोत यांच्या हस्ते आरोग्य शिबिराचे उद्घाटन झाले. डॉ. गिरीश कुमार, डॉ. सत्यजित माने, डॉ. प्रियांका माने यांनी रुग्णांची तपासणी केली.

फोटो ओळी - पाडळी येथे अशोकराव माने आयुर्वेदिक हॉस्पिटलतर्फे आयोजित आरोग्य शिबिराचे उद्घाटन सरपंच डॉ. विभा पाटील यांच्या हस्ते झाले. यावेळी जिल्हा परिषद सदस्य मनीषा माने, डॉ. गिरीश कुमार, प्रकाश पाटील, धनाजी देसाई, डॉ. सत्यजित माने, डॉ. प्रियांका माने उपस्थित होते.