वाढदिवस कराल रस्त्यावर, कारवाई होईल सर्वांवर...!

लोकमत न्यूज नेटवर्क

कोल्हापूर : मध्यरात्री १२.०१ वाजता दुसरा दिवस सुरू झाला की फटाके वाजतात, जल्लोषही सुरू होतो. त्यावेळी समजायचे की, परिसरात आज कोणाचा तरी वाढदिवस आहे. मध्यरात्रीच्या सुमारास भर रस्त्यात, चौकात दुचाकी अथवा चारचाकी वाहनावरच केक ठेवून वाढदिवस साजरा करण्याची सवय आजच्या तरुणाईला जडली आहे; पण काही गुन्हेगारी वृत्तीच्या तरुणांच्या वाढदिवस साजरा करताना चक्क तलवारीने केक कापणे, डीजेवर गाणी लावून जल्लोष करत परिसरात दहशत निर्माण केली जाते; पण सावधान... असे वागाल तर तुम्हावर पोलिसांत गुन्हा नोंद होईल, हातात बेड्या ठोकल्या जातील.

आजच्या तरुणाईत वाढदिवस आगळ्या-वेगळ्या पद्धतीने साजरा करण्याची नवी प्रवृत्ती आली आहे. मध्यरात्रीच्या सुमारास रस्त्यावरच उभारून शोभेचे फुलबाजे, फटाके उडवून गाडीवरच केक कापून जल्लोष केला जात आहे. अशा पद्धतीने जल्लोष करणाऱ्या तरुणाईवर पोलीस गुन्हे नोंदवण्यापेक्षा त्यांना रस्त्यावरच ‘खाकी’चा प्रसाद देऊन पिटाळून लावतात, अगर पोलीस अधिनियम ११० कलमांतर्गत प्रतिबंधात्मक कारवाई केली जाते. अतिउत्साही कार्यकर्त्यांवर महाराष्ट्र पोलीस अधिनियम कलम १३५, ३७ (१) (३) याप्रमाणे गुन्हा नोंदवून दंड ठोठावला जातो; पण चौकात जल्लोष करताना तलवारीने केक कापून दहशत निर्माण करणाऱ्यांना मात्र कारावासाचा मार्ग दाखवला जातो. तलवारीने केक कापणाऱ्यावर कडक कारवाईचे वर्षातून सुमारे १० ते १२ गुन्हे दाखल होतात.

...तर गुन्हा दाखल

- रस्त्यावर वाहन उभे करून त्यावर केक कापणे.

- डीजे लावून रस्त्यावर जल्लोष करणे.

- मध्यरात्री फटाके वाजवणे.

- तलवारीने केक कापणे.

- मध्यरात्री पाचपेक्षा अधिक जण एकत्र येऊन जल्लोष करणे.

आर्म ॲक्टनुसार कारवाई

मध्यरात्रीच्या वेळी रस्त्यावर वाढदिवस साजरा करताना त्याचा दुसऱ्याला त्रास होत असेल, तर त्यांच्याविरोधात पोलीस अधिनियम ११०, ११७ नुसार गुन्हा नोंदवला जातो, तर तलवारीने केक कापल्यास त्याच्यावर आर्म ॲक्टनुसार कारवाई होऊन शिक्षेची तरतूद आहे.

कोट...

तरुण मध्यरात्री रस्त्यावर वाढदिवस साजरा करतात. काही निरागस तरुणांना काठीचा प्रसाद, तर बहुतांशीवर प्रतिबंधात्मक गुन्हे नोंदवले जातात. दहशत माजवण्यासाठी रस्त्यावर वाढदिवस साजरा करणाऱ्याला मात्र बेड्या ठोकल्या जातात. म्हणून रस्त्यावर वाढदिवस साजरा करू नये.

-मंगेश चव्हाण, पोलीस उपअधीक्षक, कोल्हापूर शहर