गुढीपाडवा आज, बाजारपेठा सज्ज

कोल्हापूर : वर्षातील साडेतीन मुहूर्तापैकी पहिला मुहूर्त व मराठी नववर्षारंभ असलेल्या गुढीपाडव्याच्या पूर्वसंध्येला खरेदीसाठी अवघे शहर जणू रस्त्यावर लोटले होते. साखरेच्या माळा, चाफ्याच्या फुलांचा हार, कडुलिंबाचे डहाळे, चिव्याची काठी यासह पूजेच्या साहित्याच्या खरेदीसाठी रस्त्यावर, तर वस्तूंच्या बुकिंगसाठी शोरूम व दुकानांमध्ये मोठी गर्दी होती. त्यामुळे शहरातील मुख्य रस्त्यांवर ट्रॅफिक जॅम होत होते.

मराठी नववर्षाचा पहिला दिवस असलेल्या गुढीपाडव्याला दारात गुढी उभारली जाते. सूर्योदयापूर्वी चिव्याच्या काठीवर तांब्या ठेवून त्याला साडी, ब्लाऊज पीस, साखरेची माळ, चाफ्याच्या फुलांचा हार घातला जातो. पुरणपोळीचा नैवेद्य दाखवून हा सण साजरा केला जातो.

या मुहूर्तावर शुभकार्य केले, नव्या वस्तूची खरेदी केली की घरात समृद्धी येते, अशी श्रद्धा आहे. त्यामुळे या दिवशी आवर्जून सोने-चांदी, इलेक्ट्रॉनिक वस्तू, कपडे, मोबाईल, वाहनांची खरेदी केली जाते. त्यासाठी आधी बुकिंग करावे लागते.

सध्या कोरोना संसर्गामुळे रात्री आठ वाजताच दुकाने बंद होतात. त्यात निशवार व रविवारी कडक लॉकडाऊन असल्याने दुकाने बंदच होती. त्यामुळे सोमवारी सकाळपासूनच शहरातील बाजारपेठांत ग्राहकांची गर्दी उसळली होती. ऊन उतरल्यानंतर गर्दी वाढली होती. त्यामुळे शहरातील महाद्वार रोड, जोतिबा रोड, महापालिका चौक, पापाची तिकटी, शिंगोशी मार्केट, टिंबर मार्केट, लक्ष्मीपुरी व राजारामपुरी या प्रमुख बाजारपेठांमध्ये नागरिकांची अलोट गर्दी होती.

--

फोटो नं १२०४२०२१-कोल-गुढीपाडवा

ओळ :

मराठी नववर्षारंभ असलेला गुढीपाडवा आज, मंगळवारी साजरा होत आहे. यानिमित्त कोल्हापुरातील शिंगोशी मार्केटमध्ये साखरेच्या माळा व फुलांच्या खरेदीसाठी नागरिकांनी मोठी गर्दी केली होती. (छाया : आदित्य वेल्हाळ)

--

गुढीपाडवा ०१

यानिमित्त बाजारपेठेत आंब्याचीही मोठी आवक झाली आहे. (छाया : नसीर अत्तार)