रिक्षाचालकांसाठी अनुदान वाटप अर्जांची सुरुवात, पालकमंत्र्यांचा पुढाकार : १५ हजार बांधवांना मिळणार मदत

कोल्हापूर : राज्य शासनाने जाहीर केलेल्या रिक्षाचालकांच्या मदत वाटपाच्या ऑनलाईन अर्ज भरण्याची प्रक्रिया सोमवारपासून सुरु झाली. कोल्हापुरातील १५ हजार २५७ रिक्षाचालकांना प्रत्येकी १५०० रुपयांचे हे अनुदान मिळणार आहे. या अनुदानाचा शंभर टक्के रिक्षाचालकांनी लाभ घ्यावा, असे आवाहन करून यापुढेही रिक्षा चालकांचे प्रश्न प्राधान्याने सोडवू, अशी ग्वाही पालकमंत्री सतेज पाटील यांनी दिली.

हे अनुदान परवानाधारक रिक्षाचालकांच्या बँक खात्यावर जमा होणार आहे. यासाठी ऑनलाईन अर्ज भरावा लागणार आहे. या पार्श्वभूमीवर परिवहन राज्यमंत्री व पालकमंत्री सतेज पाटील यांच्या प्रमुख उपस्थितीत प्रादेशिक परिवहन कार्यालयात रिक्षा चालकांच्या शासकीय अनुदानासाठी ऑनलाईन अर्ज भरण्याचे प्रशिक्षण प्रादेशिक परिवहन अधिकारी डॉ. स्टीव्हन अल्वारिस व सहाय्यक प्रादेशिक परिवहन अधिकारी प्रसाद गाजरे यांनी रिक्षाचालक आणि रिक्षा वाहतूक संघटनांच्या प्रतिनिधींना दिले. शंभर टक्के रिक्षाचालकांना हे अनुदान मिळाले पाहिजे यासाठी रिक्षा संघटनांच्या पदाधिकाऱ्यांनी जास्तीत जास्त रिक्षाचालकांना या अनुदानाचा लाभ घेण्यासाठी नोंदणी करावी. कोरोनाच्या या परिस्थितीत रिक्षाचालकांनी अधिक काळजी घ्यावी, असे आवाहनही पालकमंत्री पाटील यांनी केले.

प्रादेशिक परिवहन अधिकारी डॉ. स्टीव्हन अल्वारिस म्हणाले, पालकमंत्री पाटील यांनी रिक्षाचालकांना आर्थिक मदत व्हावी म्हणून शासन स्तरावर पाठपुरावा केला. त्यामुळे हे अनुदान मिळणार असल्याचे सांगून सर्व रिक्षा परवाना धारकांच्यावतीने त्यांचे आभार मानले. यावेळी सहाय्यक प्रादेशिक परिवहन अधिकारी प्रसाद गाजरे, रोहित काटकर, राजवर्धन करपे यांच्यासह अधिकारी-कर्मचारी, रिक्षाचालक आणि रिक्षा वाहतूक संघटनांचे प्रतिनिधी उपस्थित होते.

ही माहिती भरा..

ऑनलाईन अर्ज करतांना प्रादेशिक परिवहन विभागाच्या संकेतस्थळावर रिक्षा नंबर, लायसन्स नंबर व बॅंक खात्याला लिंक केलेला आधार नंबर भरणे गरजेचे आहे.

२४०५२०२१-कोल-रिक्षाचालकांना मदत

कोल्हापुरात राज्य शासनाने जाहीर केलेल्या रिक्षाचालकांच्या मदत वाटप ऑनलाईन अर्ज भरण्याची प्रक्रिया पालकमंत्री सतेज पाटील यांच्या हस्ते सोमवारपासून सुरू झाली. यावेळी प्रादेशिक परिवहन अधिकारी स्टिव्हन अल्वारिस, सहाय्यक प्रादेशिक परिवहन अधिकारी प्रसाद गाजरे आदी उपस्थित होते.