सभासद, शेतकऱ्यांमुळेच शाहूच्या इतिहासात सोनेरी दिवस

:

उच्चांकी साखर पोती पूजन सोहळा

कागल : स्व. राजे विक्रमसिंह घाटगे नेहमी म्हणत असत, आपली स्पर्धा आपल्याशीच असली पाहिजे. त्यांचा विश्वास सार्थ ठरवित श्री छत्रपती शाहू साखर कारखान्याने चालू गळीत हंगामात कारखान्याच्या इतिहासातील उच्चांकी उसाचे गाळप व साखर उत्पादनाचे स्वतःचे रेकॉर्ड मोडून इतिहास रचला आहे. सभासद ऊस पुरवठादार शेतकरी कामगार आणि हितचिंतक यांच्या पाठबळामुळेच कारखान्याच्या इतिहासात हा सोनेरी दिवस उजाडला आहे, असे प्रतिपादन कारखान्याचे अध्यक्ष समरजित घाटगे यांनी केले.

कारखाना कार्यस्थळावर कारखान्याच्या इतिहासातील उच्चांकी साखर पोती पूजन सोहळ्यावेळी ते बोलत होते. यावेळी दहा लाख २९ हजार १११ व्या पोत्याचे पूजन कारखान्याच्या जेष्ठ संचालिका सुहासिनीदेवी घाटगे, उपाध्यक्ष अमरसिंह घोरपडे, ज्येष्ठ संचालक कर्नाटकचे माजी ऊर्जा राज्यमंत्री वीरकुमार पाटील, सचांलक, कार्यकारी संचालक जितेंद्र चव्हाण यांच्यासह मान्यवरांच्या हस्ते करण्यात आले. या कार्यक्रमाचे औचित्य साधून कारखाना मानधनधारक पैलवान अनिल चव्हाण, पॉवरलिफ्टर सोनल सावंत व इंद्रजित फराकटे या खेळाडूंचा सत्कार करण्यात आला. यावेळी आय. डी. कुंभार (करड्याळ), शंकर मेथे (शेंडूर ) महादेव तेलवेकर (पिंपळगाव), राजेंद्र कालेकर (कागल) या सभासदांनी मनोगत व्यक्त केले. स्वागत कार्यकारी संचालक जितेंद्र चव्हाण यांनी केले. उपाध्यक्ष अमरसिंह घोरपडे यांनी आभार मानले.

आणि स्व. राजेंच्या आठवणीने सगळेच गहिवरले

कारखान्याच्या इतिहासातील हा सुवर्ण क्षण पाहण्यासाठी स्व. राजे विक्रमसिंह घाटगे हवे होते. तसेच दिवंगत संचालक, सभासद यांचे कारखान्याच्या प्रगतीमध्ये मोठे योगदान आहे. अशा भावना काही ज्येष्ठ सभासदांनी व्यक्त केल्या. यावर बोलताना समरजितसिंह घाटगे म्हणाले, स्व. राजे देहाने जरी आज आपल्यामध्ये नसले, तरी विचारांनी ते येथेच आहेत. त्यांच्या शिकवणीप्रमाणे मी कारखान्याचा अध्यक्ष म्हणून नव्हे, तर विश्वस्त म्हणून जबाबदारी सांभाळत आहे. तुम्हा सर्व ज्येष्ठ सभासदांमध्ये मला स्व. राजेसाहेब दिसतात.

कागल येथे शाहू साखर कारखान्याच्या उच्चांकी साखर पोत्याच्या पूजनवेळी कारखान्याचे अध्यक्ष समरजित घाटगे, संचालिका श्रीमती सुहासिनीदेवी घाटगे, वीरकुमार पाटील, कार्यकारी संचालक जितेंद्र चव्हाण व इतर.