‘गोकुळ’ला उच्चत्तम गुणवत्तेचा ‘आयएसओ २२०००:२०१८’ मानांकन

(फोटो-०८०३२०२१-कोल-रविंद्र आपटे)

लोकमत न्यूज नेटवर्क

कोल्हापूर : उच्चतम गुणवत्ता त्याचबरोबर उत्पादकांसोबत ग्राहकांचे हित व आधूनिकतेची जोड यामध्ये ‘गोकुळ’ नेहमीच अग्रेसर राहिला आहे. या कामाची दखल घेऊन ‘आयएसओ २२०००:२०१८’ मानांकन मिळाले आहे. अशा प्रकारचे मानांकन मिळवणारा ‘गोकुळ’ राज्यातील पहिला दूध संघ आहे.

यापूर्वी गोकुळकडे शाखा व मुख्य दुग्धशाळेकडे सुरवातीस ‘आएसओ ९००२, आयएसओ ९००१ : २००८’ (अन्न व सुरक्षा कार्यप्रणाली) व त्यानंतर ‘आयएसओ २२००० :२००५’ या कार्यप्रणालीनुसार कामकाज होत होते. याचीच पुढील सुधारित कार्यप्रणाली म्हणून ‘आयएसओ २२००० : २०१८’ हे मानांकन प्राप्त करणेचा प्रयत्न गेल्या दोन वर्षांपासून संघामार्फत सुरू होता. आंतरराष्ट्रीय पातळीवर सर्टिफिकेशनचे काम करणारी जर्मनमधील एजन्सी टी.यू.व्ही. नॉर्ड यांचे वरिष्ठ पातळीवरचे अधिकाऱ्यांनी १ मार्च २०२१ ते दि. ६ मार्च, २०२१ या काळांत मुख्य दुग्धशाळेबरोबर विविध शाखांना भेटी देऊन गोकुळच्या कामकाजाची तपासणी केली. सदरच्या तपासणीमध्ये विशेषतः उत्पादित होणारे गुणवत्तायुक्त दूध व दुग्धजन्य पदार्थ, अन्न सुरक्षा कार्यप्रणालीनुसार होणारे कामकाज, प्लॅंट स्वच्छता, दूध व दुग्धजन्य पदार्थ पॅकिंगसाठी वापरण्यात येणारे पॅकिंग मटेरियल व पॅकिंगवेळी निघणारे वाया गेलेल्या पॅकिंग मटेरियलची केली जाणारी निर्गत आदी बाबींचा विचार करून ‘आयएसओ २२०००:२०१८’ मानांकन देण्याचे जाहीर केले.

कोट-

कोरोनाच्या काळातही संघाचे अधिकारी व कर्मचाऱ्यांनी सदरचे मानांकन प्राप्त करण्यासाठी सहकार्य केलेच त्याचबरोबर उच्च दर्जाचे दूध पुरवठा करून शेतकऱ्यांनी मोलाची साथ दिली. त्यामुळेच हे यश मिळाले, आगामी काळात यापेक्षाही चांगले काम करू.

- रवींद्र आपटे (अध्यक्ष, गोकुळ)