बालकांचे नियमित लसीकरण करा

लोकमत न्यूज नेटवर्क

कोल्हापूर : कोविड संसर्गाच्या भीतीमुळे प्राथमिक आरोग्य केंद्रे किंवा खासगी दवाखान्यात नियमित लसीकरण करण्यास पालक टाळाटाळ करत आहेत. मात्र, पावसाळ्यात होणारे संसर्ग व कोरोनाची संभाव्य तिसरी लाट पाहता, बालकांचे नियमित लसीकरण करावे, असे आवाहन टास्क फोर्सने पालकांना केले आहे.

कोरोनाच्या पहिल्या लाटेत नियमित लसीकरणासाठी बालकांना घेऊन दवाखाना किंवा लसीकरण केंद्रावर जाण्याबाबत पालकांच्यात मनात भीती असल्याचे निदर्शनास आले. त्यात लॉकडाऊनमुळे प्रवासाच्या अडचणी आदींमुळे नियमित लसीकरणासाठी टाळाटाळ केली जाते. सध्या कोरोनाची दुसरी लाट ओसरत असल्याचे दिसून येते. पावसाळ्यामधील येणारे आजार तसेच कोराेनाची संभाव्य तिसऱ्या लाटेत बालकांमध्ये माेठ्या प्रमाणावर संक्रमणाची शक्यता आहे. या सगळ्या पार्श्वभूमीवर बालकांचे नियमित लसीकरण करून घेणे गरजेचे आहे.

विविध कारणांमुळे राहिलेला लसीकरणाचा डोस देण्यासाठी व अधिक माहितीसाठी पालकांनी त्यांच्या कौटुंबिक डॅाक्टरांना, बालरोगतज्ज्ञाकडे, नजिकच्या शासकीय, महानगरपालिकेच्या लसीकरण केंद्रावर संपर्क करावा व आपल्या पाल्यांना सुरक्षित करावे, असे आवाहन विभागीय आयुक्त सौरभ राव व कोविडसाठी गठित बालरोगतज्ज्ञांच्या टास्क फोर्सच्या वतीने करण्यात आले आहे.