आजपासून गणेशोत्सव..!

थाटात होणार आगमन : पारंपरिक वाद्यांना पसंती

कोल्हापूर : गणेशोत्सवाच्या पूर्वसंध्येला रविवारी दीड दिवसाच्या गणेशमूर्तींचे रविवारी मोठ्या दिमाखात आगमन झाले. तसेच पूलगल्ली तालीम, दिलबहार, संभाजी तरुण मंडळासह अनेक मंडळांनी गणेशमूर्तीची पारंपरिक वाद्यांच्या गजरात मिरवणुकीसह प्रतिष्ठापना केली. दरम्यान आज, सोमवारी घरगुती व सार्वजनिक मंडळांच्या गणेशमूर्तींचे आगमन होणार असून, सजावटीबरोबरच नैवेद्यासाठी लागणारा सुका मेवा, प्रसादाचे मोदक, उदबत्ती, धूप, नारळ, कापूर या वस्तूंच्या खरेदीसाठी पापाची तिकटी, महाद्वार रोड, लक्ष्मीपुरी, आदी ठिकाणी पूर्वसंध्येला भक्तांसह बच्चेकंपनीची मोठी गर्दी झाली होती.
बाप्पाचा नैवैद्य ,आरास आदी वस्तूंच्या खरेदीकरिता पापाची तिकटी, महाद्वार रोड, गंगावेस येथील विविध अगरबत्ती, अत्तर विक्री करणाऱ्या दुकानांमध्ये दिवाळीसारखी गर्दी झाली होती. गणेशापुढे ठेवण्यासाठी पाच फळे लागतात. त्यांचा भावही अन्य दिवसांच्या मानाने रविवारी चढाच होता. सायंकाळी पाचनंतर तर पापाची तिकटी, महाद्वार रोड, कुंभार गल्ली, शाहूपुरी कुंभार गल्ली, आदी परिसरात पाय ठेवायला जागा नव्हती. विशेष म्हणजे दीड दिवसाच्या गणेशमूर्ती घरी नेण्यासाठी अनेक नागरिकांनी गर्दी केली होती. या उत्सवात गणेशमूर्तीवर उधळण करण्यासाठी संकेश्वरी चिरमुऱ्यांना मोठी मागणी असते.
रविवार सार्वजनिक सुटी असल्याने अनेकांनी सहकुटुंब खरेदी व घरगुती गणेशमूर्ती नेल्या. सोमवारची गर्दी लक्षात घेता ३० टक्क्यांहून अधिक मूर्ती अनेक कुटुंबीयांनी नेल्या. यामध्ये दीड, अडीच दिवसांच्या गणेशमूर्तींचा समावेश होता. विशेष म्हणजे पहाटे साडेतीन ते दुपारी दोनपर्यंत गणेशमूर्तीची प्राणप्रतिष्ठापना करण्याची वेळ असल्याचे अनेक पुजाऱ्यांनी सांगितले.
काही गणेश मंडळांनी आजची गर्दी लक्षात घेता बापट कॅम्प, शाहूपुरी कुंभार गल्ली येथून रविवारी दुपारनंतर गणेशमूर्ती नेण्यास सुरुवात केली. यामध्ये दिलबहार तालीम मंडळ,जय शिवराय, तिरंगा मित्रमंडळ आदीसह मंगळवार पेठेतील संभाजीनगर येथील छत्रपती संभाजीनगर तरुण मंडळ, जंगी हुसेन तालीम मंडळ, बजापराव माने तालीम मंडळ, नृसिंह दोस्त मंडळ, पावडर गु्रप, सिद्धाळा गु्रप, अष्टविनायक तरुण मंडळ, आदी मंडळांचा समावेश होता.
दरम्यान, परगावी नोकरीला असणाऱ्यांनी आपापले गाव गाठण्यासाठी एकीकडे बसस्थानकावर गर्दी केली; तर पुण्या-मुंबईकडे असणारे मूळ कोल्हापूरकरही मोठ्या संख्येने शहरात दाखल झाले आहेत. येणाऱ्या संपूर्ण आठवड्यात गणरायाचे वास्तव्य घरोघरी राहणार असल्याने त्याच्या तयारीत कुटुंबच्या कुटुंब रंगल्याचे चित्र सर्वत्र पाहावयास मिळत आहे. सार्वजनिक गणेशोत्सव मंडळांच्या कार्यक र्त्यांच्या धावपळीला तर अंत नसल्याचे दिसून आले.
अंबाबाई मंदिरातील गणरायाचे आगमन
४कोल्हापूर : करवीर निवासिनी श्री अंबाबाई मंदिरातील मानाच्या गणेशमूर्तीचे रविवारी रात्री गरुड मंडपात पारंपरिक वाद्यांच्या गजरात आगमन झाले. श्री महालक्ष्मी भक्त मंडळाच्या या गणेशमूर्ती स्थापनेला १२६ वर्षे पूर्ण होत आहेत.
४रविवारी सायंकाळी पावणेसात वाजता पापाची तिकटी येथील मूर्तिकार महेश वडणगेकर यांच्या घरापासून गणेशमूर्तीची मिरवणूक सुरू झाली. मिरवणुकीच्या रथाचे पूजन भक्त मंडळाचे अध्यक्ष राजू मेवेकरी यांच्या हस्ते झाले. यावेळी संजय बावडेकर, नंदू मराठे, गजानन नार्वेकर, वसंतराव पोवार, राजू जुगळे, रणजित मेवेकरी, तन्मय मेवेकरी, सागर बावडेकर, आदींच्या उपस्थितीत मिरवणुकीचा रथ ओढण्यात आला. या मिरवणुकीच्या अग्रभागी सुप्रभात ब्रास बँडच्या पथकाने विविध धून सादर करीत उपस्थितांची वाहवा मिळविली; तर जोडीला करवीर नाद ढोल-ताशा पथकाने विविध वाद्यांचे प्रकार सादर केले.
हरितालिका पूजन उत्साहात
४भगवान शंकराचे प्रतीक म्हणून वाळूपासून साकारलेली शंकराची पिंडी, मागे पार्वतीची प्रतिमा, अभिषेक, बेल, पान, दूर्वा, धूप, दीप, आरती, नैवेद्य, हरितालिका व्रताच्या पुस्तकाचे वाचन अशा धार्मिक विधींनी रविवारी कुमारिका व सुवासिनींनी हरितालिकेचे पूजन केले.
४पाटावर वाळूपासून शंकराची पिंडी तयार केली जाते. शेजारी पार्वती आणि गणेशाची प्रतिमा ठेवली जाते आणि वस्त्रमाळ, अभिषेक, धूप, दीप, आरती, बेलपान चढवून हरितालिकेचे पूजन केले जाते. यानिमित्त दिवसभर व्रतस्थ राहून शंकराची आराधना केली जाते.