कोल्हापूर : येथील युनिक आॅटोमोबाईल्स इंडिया या वाहन वितरण करणाऱ्या कंपनीचा युजर आयडीसह पासवर्ड हॅक करून नेट बँकिंगद्वारे तब्बल सव्वा कोटी रुपयांची फसवणूक करणाऱ्यां आंतरराज्य टोळीतील चौघांना पोलिसांनी झारखंडमध्ये अटक केली.
संशयित राजीव रंजन कुमार (वय ३३, रा. पटना, बिहार), विकास साव ऊर्फ विकास कालू (३३, रा. पटना, बिहार), मातदिनसिंह सिकरवार ऊर्फ रामबीरसिंह परमार (रा. धौलपूर, राजस्थान) व संशयित महिला कहकसा परवीन (२८, रा. पटना) अशी त्यांची नावे आहेत. या टोळीचा म्होरक्या पश्चिम बंगालमधील असून तो नायजेरियात लपला आहे. पोलीस त्याच्या मागावर आहेत, अशी माहिती शहर पोलीस उपअधीक्षक डॉ. प्रशांत अमृतकर यांनी दिली.
युनिक आॅटोमोबाईल्स कंपनीचा युजर आयडीसह पासवर्ड हॅक करून नेट बँकिंगद्वारे कंपनीची तब्बल सव्वा कोटी रुपयांची फसवणूक केली होती. ही रक्कम देशभरातील बारा बँक खात्यांवर वर्ग केली होती. नवी मुंबई, मुंबई, दिल्ली, जमशेदपूर, गुवाहाटी, पश्चिम बंगाल, आदी ठिकाणी असलेल्या खातेदारांच्या खात्यांमध्ये पाच ते वीस लाख रुपये वर्ग करण्यात आले होते.
पोलिसांनी संबंधित बँकांमध्ये जाऊन संशयित खात्यांची माहिती घेतली, खातेदारांचे पत्ते मिळविले; परंतु संशयितांनी स्वत:चे पत्ते व मोबाईल नंबर बदलल्याने त्यांचा ठावठिकाणा लागत नव्हता. सायबर क्राइमच्या मदतीने शाहूपुरी पोलिसांनी झारखंडमधून महिला कहकसा परवीन हिच्यासह चौघांना ताब्यात घेतले. या चौघांच्या बँक खात्यावर ६० लाखांची रक्कम जमा झाल्याचे निदर्शनास आले.
त्यातील २० टक्के रक्कम या खातेदारांना मिळाली असून, उर्वरित रक्कम पश्चिम बंगाल येथील संशयिताने हडप केली आहे. याच टोळीने झारखंडमधील बिस्तपूर आणि नाशिकमध्येही अशाच पद्धतीने आॅनलाइन रक्कम लंपास केली आहे, अशी माहिती डॉ. अमृतकर यांनी दिली.
मोठे रॅकेटज्या कंपन्यांची कोट्यवधी रुपयांची उलाढाल असते, त्यांचे बॅँक डिटेल्स मिळवून हॅकर्स कोट्यवधी रुपयांच्या रकमा आपल्या हस्तकांच्या बॅँक खात्यावर जमा करतात. या रकमा कोठून येतात, हे खातेदारांना माहीत नसते. त्यांना रकमेच्या स्वरूपात कमिशन मिळते. जर पैसे देण्यास खातेदाराने टाळाटाळ केली, तर पुन्हा त्या खात्यावर पैसे जमा केले जात नाहीत. हॅकरांचे हे मोठे रॅकेट असून ते उद्ध्वस्त करण्याची गरज आहे.