अग्निशमनची महापुरात तत्परता

कोल्हापूर : महापुराच्या धोकादायक स्थितीत सलग आठवडाभरात महापालिकेचा अग्निशमन विभाग २४ तास कार्यकर्तव्यासाठी ‘अलर्ट’ ठेवला होता. त्यानुसार तत्परता दाखवत महापुराचा फटका बसला असतानाही अग्निशमन दलाच्या जवानांनी सुमारे ४ हजार १०० नागरिकांना सुरक्षितस्थळी स्थलांतरित केले. यासाठी विभागाची ४ दक्षता पथके, १००हून अधिक जवान व स्वयंसेवी संस्थेचे कार्यकर्ते यांनी अहोरात्र रेस्क्यू ऑपरेशन राबविले.

आपत्कालीन स्थिती उद्भवण्यापूर्वी दि. १७ जुलैपासून अग्निशमन विभागाने दक्ष राहात यंत्रणा तैनात केली. ताराराणी फायर स्टेशन नं. ९ येथून ही पथके २४ तास अलर्ट होती. हवामानाच्या मिळालेल्या माहितीनुसार, पुराचे पाणी येत असलेल्या भागात बुलेट, जीप, फायर फायटरच्या माध्यमातून प्रथम ध्वनीक्षेपकावरुन सावधानतेच्या सूचना देण्यात आल्या होत्या.

दि. २२ जुलै रोजी पावसाने रामानंद नगर येथे घरांमध्ये पाणी शिरले, तेथे तत्काळ बोट व पथकांच्या मदतीने १०० नागरिकांना बाहेर काढून जरग नगर शाळेत स्थलांतरित केले. दुसऱ्या दिवशी (दि. २३ जुलै) पावसाचा जोर वाढला, त्यानंतर दि. २६ जुलैपर्यंत महापुरात अग्निशमन विभागाने बोटी, फायर रिंग, लाईफ जॅकेट्सच्या सहाय्याने रमणमळा, लाईन बझार, सिध्दार्थ नगर, शाहुपूरी, कुंभार गल्ली, सुतारवाडा, पंचगंगा हॉस्पिटल परिसर, मुक्त सैनिक वसाहत, काटे मळा, यशोदा पार्क, जाधववाडी, बापट कॅम्प, जावडेकर बिल्डींग, हरिपूजा पूरम नगर, विंग्स हॉस्पिटल परिसर, दुधाळी, डायमंड हॉस्पिटल आदी ठिकाणाहून हॉस्पिटलमधील रुग्ण व रहिवासी इमारतीमधील ४ हजार नागरिकांना महापुरातून रेस्क्यू ऑपरेशनद्वारे बाहेर काढले. घरी राहिलेल्यांना जवानांनी बोटीद्वारे जाऊन अन्नपाणी, दूध, बिस्कीटे, औषधे दिली.

अग्निशमन विभागाने रेस्क्यू बोट, लाईफ जॅकेट्स, लाईफ रिंग, स्नेक स्टिक, ॲनिमल कॅचेर, कटर मशीन व रेस्क्यू व्हॅन इत्यादी साहित्याचा वापर करुन नागरिकांना सुरक्षित ठिकाणी पोहोचवले. पूर ओसरु लागल्यानंतर रोगराई पसरु नये म्हणून पूरबाधित भागातील रस्ते फायर फायटरच्या सहाय्याने पाणी फवारणी करुन साफ केले.

कोविड रुग्णांना ऑक्सिजन, व्हेंटिलेटर लावून काढले बाहेर

कोविड रुग्णालयातील २२ रुग्णांना ऑक्सिजन, व्हेंटिलेटर व मास्क लावून बोटीच्या सहाय्याने पुराच्या पाण्यातून बाहेर काढले. पूरक्षेत्रातील इतरही हॉस्पिटलमधील किमान १५० रुग्णांनाही बाहेर काढले. साप, श्वान, मांजर अशा प्राण्यांनाही पकडून सुरक्षित ठिकाणी सोडले.

अग्निशमन दलाची यंत्रणा...

- रेस्क्यू दिवस : ०७

- दक्षता पथके : ०४

- वाहने : ०७

- जवान : १००

फोटो नं. ३१०७२०२१-कोल-फायर०१

ओळ : महापुरात शहरामध्ये महापालिकेच्या अग्निशमन विभागाच्या जवानांनी तत्परता दाखवत अनेक नागरिकांना सुरक्षितस्थळी स्थलांतरित केले.