उजळाईवाडीत पाच घरे फोडली

उचगाव : उजळाईवाडी (ता. करवीर) येथील विमानतळ रोडवरील करवीरनगर व अमन पार्क येथील पाच घरे शनिवारी पहाटे दोनच्या सुमारास चोरट्यांनी फोडली. सुदैवाने या धाडसी चोरीत चोरट्यांच्या हाती मोठी रक्कम लागली नाही. यावेळी नागरिक जागे झाल्याने चोरटे पळून गेले. शुक्रवारी पहाटे चोरट्यांनी कुलुपबंद घरांना लक्ष्य केले. घराचे कुलूप व कडी-कोयंडे उचकटून घरात प्रवेश केला. तिजोरी, कपाटे फोडून साहित्य अस्ताव्यस्त केले. मात्र सुदैवाने त्यांच्या हाती मोठी रक्कम लागली नाही. मात्र चोरटे इतर घरे फोडण्याचा प्रयत्न करताना नागरिकांनी आरडाओरड केल्याने ते पळून गेले. या घटनेची माहिती समजताच गोकुळ शिरगाव पोलीस ठाण्याचे साहाय्यक पोलीस निरीक्षक सुशांत चव्हाण, पीएसआय रविकांत गच्चे व पोलीस कर्मचाऱ्यांनी परिसरास भेट देऊन पाहणी केली व यापुढे गस्त वाढविण्याची ग्वाही दिली. पोलिसांनी परिसरातील फुटेज ताब्यात घेतले असून चोरांसाठी शोधमोहीम सुरू केली आहे.