फेसबुकच्या माध्यमातून बॅंकेतील महिला अधिकाऱ्याची आर्थिक फसवणूक

कोल्हापूर : फेसबुकच्या माध्यमातून कोल्हापुरातील एका नामांकित बॅंकेत काम करणाऱ्या महिला अधिकाऱ्यास एका व्यक्तीने भूलथापा लावून ३५ हजार ५०० रुपयांचा गंडा घातला. फसवणूक झाल्याचे लक्षात येताच त्यांनी तातडीने पोलिसात तक्रार दिली. शाहूपुरी पोलीस ठाण्याकडे सायबरचे काम पाहणारे पोलीस कॉन्स्टेबल दिग्विजय चौगले यांनी कसोशिने तपास करून फसवणुकीची रक्कम अवघ्या २४ तासांत मिळवून दिली.

पोलिसांनी दिलेली माहिती अशी की, एका नामांकित बॅंकेत लवली कुमारी (मूळच्या बिहार) या अधिकारी आहेत. त्यांच्याशी फेसबुकद्वारे अनोळख्या व्यक्तीने मेसेज पाठवला. आपण परदेशी नागरिक असल्याचे भासवत तुमच्यासाठी भेटवस्तू पाठवली आहे, ती विमानतळावर कायदेशीर बाबीत अडकली, विमानतळावर ३५ हजार ५०० रुपये दंड झाला असून, तो भरावा लागेल, अन्यथा अडचणीत याल, अशी भीती दाखवली. त्या महिला अधिकाऱ्याकडून व्यक्तीने गुगल पे च्या माध्यमातून ३५ हजार ५०० रुपये मागवले. काहीवेळाने त्या महिला अधिकाऱ्याला आपली फसवणूक झाल्याचे लक्षात आले, त्यांनी शाहूपुरी पोलीस ठाण्यात तक्रार दिली.

शाहूपुरी पोलीस ठाण्यातील पो. नि. श्रीकृष्ण कटकधोंड यांनी पोलीस ठाण्यातील सायबरचे काम पाहणारे पोलीस दिग्विजय चौगले यांना तपासाच्या सूचना केल्या. चौगले यांनी कसोशिने तपास करत झालेल्या ट्रान्झेक्शनचा आधार घेत फसवणूक झालेली रक्कम परत मिळवून दिली.

ऑनलाईन सुविधांचा लाभ घेताना सावधान!

ऑनलाईन सुविधांचा लाभ घेताना तसेच सोशल मीडियावर अनोळखी व्यक्तीशी मैत्री करू नये तसेच अनोळखी व्यक्तीने पाठवलेल्या कोणत्याही लिंक ओपन करू नयेत. महत्त्वाची बोलणी, व्यवहार अगर करार हे समक्ष भेटूनच करावेत. सोशल मीडियावरील फसव्या जाहिराती व अमिषांपासून सावधान राहावे. आर्थिक फसवणूक झाल्यास तातडीने पोलीस ठाण्याशी संपर्क साधावा, असे आवाहन शाहूपुरी पोलिसांनी केले आहे.