शुल्क भरा, मगच उत्तरपत्रिका बघा...

विद्यापीठाच्या तंत्रज्ञान विभागाच्या फतव्याने नाराजी

कोल्हापूर : शिवाजी विद्यापीठाच्या तंत्रज्ञान अधिविभागाने अभ्यासक्रमाचे शुल्क भरा, मगच सोडविलेल्या उत्तरपत्रिका बघा, असा फतवा काढल्याची तक्रार काही विद्यार्थ्यांनी केली आहे. विभागाच्या अशा स्वरूपातील निर्णयामुळे विद्यार्थ्यांमध्ये नाराजी पसरली आहे.तंत्रज्ञान विभागातील विविध अभ्यासक्रमांच्या प्रथम, द्वितीय, तृतीय आणि अंतिम वर्षातील विद्यार्थ्यांच्या परीक्षा झाल्या आहेत. विद्यार्थ्यांनी लिहिलेल्या उत्तरपत्रिकांची तपासणी, मूल्यांकन योग्य पद्धतीने झाले आहे का? हे समजण्यासाठी त्यांना त्यांच्या उत्तरपत्रिका विद्यापीठाकडून दाखविल्या जातात. त्याची प्रक्रिया गेल्या तीन दिवसांपासून सुरू झाली आहे. मात्र, त्यात अभ्यासक्रमाचे शुल्क भरा, त्यानंतरच उत्तरपत्रिका दाखविण्यात येतील, अशा सूचना विभागाकडून देण्यात आल्या आहेत. पहिल्या पेपरची उत्तरपत्रिका दाखविल्यानंतर अशा स्वरूपातील फतवा काढण्यात आल्याची तक्रार विद्यार्थ्यांनी केली आहे. त्यात ज्या विद्यार्थ्यांनी शुल्क पूर्ण भरलेले नाही. त्यांना उत्तरपत्रिका दाखविण्यात येत नाहीत. संबंधित विद्यार्थ्यांना शुल्क भरण्यासाठी ठरावीक दिवसांची मुदत विभागाने दिली आहे. विभागाने अचानकपणे अशा स्वरूपातील घेतलेल्या भूमिकेमुळे दोन ते तीन दिवसांत शुल्क भरण्यासाठी एकाचवेळी पैसे कुठून आणायचे, असा प्रश्न विद्यार्थ्यांना पडला आहे. (प्रतिनिधी)