सलग पाचव्यांदा बिनविरोध निवडणुकीचा होनेवाडीकरांचा व

सलग पाचव्यांदा बिनविरोध निवडणुकीचा होनेवाडीकरांचा वेगळा आदर्श

* प्रभागवार बैठकातून इच्छुकांच्या मुलाखतीतून उमेदवारी

सदाशिव मोरे। आजरा

आजरा तालुक्यातील पाच ग्रामपंचायतींची निवडणूक बिनविरोध झाली आहे, पण होनेवाडी गावची ग्रामपंचायत सलग पाचव्यांदा बिनविरोध करून ग्रामस्थांनी जिल्ह्याला एक वेगळा आदर्श घालून दिला आहे. प्रभागवार बैठकातून इच्छुकांच्या मुलाखती व समजाकार्य पाहून उमेदवार निवडण्याचे दिव्य कार्य सुकाणू समितीने केले आहे. शासनाच्या सर्व योजना यशस्वीपणे राबवून आदर्श गाव ही संकल्पना राबविलेले होनेवाडी हे गाव आहे. तंटामुक्त अभियान, संत गाडगेबाबा स्वच्छता अभियान, निर्मलग्राम योजना, आदर्श ग्राम योजना यशस्वीपणे राबविल्या आहेत. गेल्या पाचवेळा ग्रामपंचायतींची निवडणूक बिनविरोध केली आहे. गट-तट पक्ष बाजूला ठेवून विकासकामांसाठी एकत्र येऊन काम करणारे गाव म्हणून होनेवाडी गावाचा उल्लेख केला जातो. ग्रामपंचायतवगळता सर्व निवडणुका अटीतटीने व चुरशीने मतदान करून आपले गावावरील वर्चस्व सिद्ध करण्यात याठिकाणचे नेतेमंडळी हुशार आहेत.

ग्रामपंचायत निवडणुकीसाठी प्रत्येक प्रभागासाठी स्वतंत्र सुकाणू समिती, स्वतंत्र बैठका, इच्छुकांच्या मुलाखती, इच्छुक उमेदवारांनी आजपर्यंत केलेले समाजकार्य, त्यांच्याबाबत प्रभागातील नागरिकांची असलेली भूमिका हे सर्व जाणून घेऊन उमेदवारांची निवड करण्यात आली.

* विकासासाठी सर्वजण एकत्र

गावातील रस्ते, गटर्स, पाणी योजना यासाठी सर्व ग्रामस्थ एकत्र येतात. नेतेमंडळींची भेट घेणे, त्यांना संबंधित कामाची गरज पटवून सांगणे व ते काम मार्गस्थ लावण्यात ग्रामस्थ संघटित होतात. रक्तदान शिबिरापासून गरजू व्यक्तींना मदत करणे व गावातील विकासासाठी एकत्र येण्याची परंपरा गेली २५ वर्षांपासून होनेवाडी ग्रामस्थांनी ठेवली आहे. ---------------------------------