पोलीस आईसोबत आता रोज गमाडी गंमत

कोल्हापूर : पोलीस दलात कार्यरत असलेल्या महिला पोलिसांना कर्तव्याबरोबरच कौटुंबिक जबाबदारीचाही भार आहे. यातून वर्षातील बारमाही सण-उत्सवातील बंदोबस्त, गुन्हेगारी यामुळे वर्षभरातून अनेक वेळा ८ तासांपेक्षा अधिक काळ ड्युटी बजावण्यातच जातो. त्यामुळे कौटुंबिक जबाबदारी व कर्तव्य यावर परिणाम होत आहे. ही बाब जाणून राज्य शासनाने आठ तासांची ड्युटी करण्याचा निर्णय घेतला. या निर्णयाचे पोलीस दलातील महिला पोलीस कर्मचाऱ्यासह त्यांच्या कुटुंबातील पाल्यांनीही मुख्यमंत्र्यांचे आभार मानले आहेत. विशेषत: लहानग्यांना आपल्या आईसोबत अधिक वेळ मिळणार असल्यामुळे मोठा आनंद झाला आहे.

आईबरोबर रोज खेळता येणार

आई एकदा ऑफिसला गेली की, ती रात्रीच घरी परतते. त्यामुळे मला तिच्याबरोबर खेळता येत नाही. आता सीएम काकांनी केवळ आठ तासांचीच ड्युटी केली आहे. त्यामुळे मला आता आईसोबत ड्युटी संपल्यानंतर अधिक काळ खेळता येणार आहे. शाळेच्या अभ्यासातील प्राॅब्लेम मला तिच्याकडून सोडवून घेता येतील. आता माझे हट्ट तिला पुरवायला वेळ मिळणार आहे.

- निधा कात्रट, महिला पोलीस कर्मचारी मुलगी.

प्रतिक्रिया

राज्य शासनाच्या या निर्णयामुळे आम्हा महिला पोलीस कर्मचाऱ्यांना कौटुंबिक जबाबदारी सांभाळून चांगल्या प्रकारे कर्तव्यावरही लक्ष केंद्रित करता येणार आहे. कुटुंबाला जादा वेळ देता येणार असल्याने मुलांचे पालन पोषणही चांगल्या प्रकारे करता येईल, जेणेकरून संस्कारक्षम पिढी घडविण्यासाठी मदत होईल.

अश्विनी पाटील, पोलीस कर्मचारी

प्रतिक्रिया

महिला पोलिसांची ड्युटी सीएम साहेबांनी आठ तासांची केली, हे ऐकून आनंद झाला. हा सुखद धक्का आहे. या निर्णयाची गेली कित्येक वर्षे आम्ही महिला कर्मचारी प्रतीक्षा करीत होतो. पहिलेच मुख्यमंत्री आहेत की ज्यांनी असा मोठा निर्णय घेतला आहे. यापूर्वी आठवड्यातून एक दिवस सुट्टी मिळाली की, त्यात अनेक कामे एका दिवसांत करायला लागत होती. मुलांकडेही लक्ष देता येत नव्हते. सकाळी आठ वाजता ड्युटी सुरू झाली की, ती रात्री आठनंतर संपत होती. कदाचित आठचे नऊ, दहा वाजत होते. त्यामुळे कौटुंबिक जबाबदारीकडे पुरेशा प्रमाणात लक्ष देता येत नव्हते. आता या निर्णयामुळे कुटुंबाकडे लक्ष देता येईल. सीएम साहेबांना अनेक धन्यवाद.

- प्रज्ञा पंढरीनाथ पाटील, महिला पोलीस कर्मचारी.

पोलीस ठाण्यांची संख्या : ३१

एकूण पोलीस कर्मचारी संख्या - २,७५३

महिला पोलीस कर्मचारी अधिकारी संख्या - ४८३