रोजगार हमी पाणंद रस्ते तालुक्यातील ६२ पैकी फक्त ६ गावांत

( भाग - १ )

दत्ता बिडकर

हातकणंगले : तालुक्यातील ६० पैकी फक्त ६ गावांमध्ये रोजगार हमी योजनेतून २ कोटी ६० लाखांच्या पाणंद रस्त्याची कामे घेण्यात आली आहेत. तालुक्यातील इतर ५४ गावांचा समावेश का झाला नाही? यावरून वादंग सुरू झाला आहे. ६ गावांतील पाणंद रस्त्यांच्या कामावर मजुरांच्या यादीमध्ये चक्क जनावराचे डॉक्टर, इन्कम टॅक्सधारक, छोटे उद्योजक, ऐंशी वर्षांचे वृद्ध आणि स्वत:च्या शेतीवर कधीही काम केले नाही, अशा गृहिणींचा समावेश आहे. रोजगार सेवक, ग्रामसेवक, कंत्राटी अभियंते आणि या विभागाचे विस्तार अधिकारी यांच्या मिलिभगतने बोगस हजेरी पगारपत्रक तयार करून रोजगार हमी योजनेच्या कामामध्ये लाखो रुपयांचा ढपला पाडला जात आहे.

तालुक्यातील रुकडी ७४ लाख ३२ हजार, माणगाव ७१ लाख ५२ हजार, हेरले २७ लाख ७२ हजार, चंदूर ३६ लाख २९ हजार, पट्ठणकोडोली १६ लाख २६ हजार आणि आतिग्रे ३६ लाख १६ हजार या सहा गावांमध्ये २ कोटी ६० लाखांचे पाणंद रस्ते महात्मा गांधी राष्ट्रीय ग्रामीण रोजगार हमी योजनेतून केले आहेत. ही पाणंद रस्त्यांची कामे पंचायत समिती सद्स्य, गावपातळीवरील कार्यकर्ते यांच्या पुढाकाराने ुसुरू आहेत. शासनाचा हेतू बासनात गुंडाळून गावपातळीवरील ग्रा. पं. सद्स्य, सरपंच, पंचायत समिती सद्स्य यांनी रोजगार हमीच्या कामाच्या माध्यमातून स्वत:च्या तुंबडया भरण्यासाठी मजुरांना वेठीस धरले आहे. मजुरांच्या नावे बँक खात्यामध्ये रक्कम जमा होताच रोजगार सेवक चिरीमिरी देऊन मजुरांकडून जमा रकमा हातोहात लंपास करत आहेत.

गाव नकाशावर सरकारी पाणंद रस्ते ३३ फुटाचे आहेत. या रस्त्यावर दोन्ही बाजूच्या शेतकऱ्यांनी अतिक्रमण करून रस्ते १०-१२ फुटांवर आणून सोडले आहेत. पाणंद रस्त्यावरील अतिक्रमणे काढली पाहिजेत; मगच पाणंद रस्ते रोजगार हमी योजनेतून करावे, असेही मत शेतकरी व्यक्त करत आहेत.

कामावर न जाता पैसे

ज्या कामावर कधी गेलो नाही, जे काम आपण केले नाही, अशा कामाचे एक -दोन हजार मिळत असतील, तर का सोडा, अशी मानसिकता रोजगार हमीच्या हजेरी पगारपत्रकावर सह्या करणाऱ्या मजुरांची झाली असून, सरकारचे पैसे कोण काय खिशातून देतो काय, का कुणाला का सोडा, अशी गावपातळीवरील मजुरांची प्रतिक्रिया आहे.

फोटो = रोजगार हमी रस्त्याचे