आजरा-महागाव रोडवरील सीडी फार्म चौकात बिगरपरवाना व बेकायदा एक किलो वजनाचा गांजासदृश अमली पदार्थ घेऊन जाणाऱ्या मोहसीन अकबरअली मुल्ला (वय ३८, रा. वाडा गल्ली, आजरा) याला पोलिसांनी अटक केली आहे. त्याच्याकडून ९५४ ग्रॅम वजनाचा गांजासदृश पदार्थ, मोबाईल व होंडा कंपनीच्या गाडीसह ७२ हजारांचा माल जप्त केला आहे.
पोलिसांतून मिळालेली माहिती अशी, शनिवारी दुपारी पावणेदोनच्या दरम्यान मोहसीन मुल्ला हा आपल्या मोटारसायकलने आजरा-महागाव-नेसरी रस्त्यावरील सीडी फार्म चौकात आला असता पोलीस उपनिरीक्षक युवराज जाधव यांनी त्याच्याकडे चौकशी केली. त्यावेळी त्याच्याकडे विनापरवाना व बेकायदा १२००० किमतीचा एक किलो वजनाचा गांजासदृश अमली पदार्थ, मोबाईल व गाडी आढळून आली. त्याच्यावर अमली पदार्थविरोधी कायद्यानुसार गुन्हा दाखल केला असून त्याला अटक करण्यात आली आहे. अधिक तपास सहायक पोलीस निरीक्षक बालाजी भांगे करीत आहेत.