‘डीओटी’मध्ये लक्षणे नसलेल्या ६० रुग्णांवर उपचार सुरू

कोल्हापूर : शिवाजी विद्यापीठातील ‘डीओटी’ (डिपार्टमेंट ऑफ टेक्नॉलॉजी)मध्ये महानगरपालिका प्रशासनातर्फे सोमवार (दि. १२) पासून कोविड केअर सेंटर सुरू करण्यात आले. तेथे सीपीआर व आयसोलेशन रुग्णालयातील कमी लक्षणे असलेल्या ६० रुग्णांना स्थलांतर करून उपचार सुरू केले. या सेंटरला जादा डॉक्टर्स, नर्स आणि रुग्णवाहिकेची गरज आहे.

कोल्हापूर जिल्ह्यात कोविड रुग्णांची संख्या वाढत चालली असून रुग्णांवर उपचार कुठे आणि कसे उपचार करायचे, असा प्रश्न जिल्हा प्रशासन आणि आरोग्य प्रशासनासमोर आहे. महानगरपालिका हद्दीतही रुग्णसंख्या वाढत असून त्यांच्यावर उपचार करण्याची जबाबदारी महापालिका प्रशासनाने उचलली आहे. गतवर्षी कोविड महामारीच्या काळात तत्कालीन आयुक्त डॉ. मल्लिनाथ कलशेट्टी यांनी रातोरात शहराच्या विविध भागांत नऊ कोविड केअर सेंटर सुरू केली होती. त्याशिवाय संस्थात्मक अलगीकरण केंद्रेही सुरू केली होती. शिवाजी विद्यापीठातील डीओटी, वसतिगृहाची इमारत, लाईन बाजारजवळील अंडी उबवण केंद्र, शेंडा पार्क प्रशिक्षण केंद्राची इमारत अशी चार कोविड केअर सेंटर्स पुन्हा सुरू करण्याचा निर्णय महापालिका प्रशासनाने घेतला असून त्यातील डीओटी सेंटर सोमवारपासून प्रत्यक्षात सुरू करण्यात आले. कमी लक्षणे असलेल्या सीपीआर रुग्णालयातील ४०, तर आयसोलेशन रुग्णालयातील २० कोविड रुग्णांना तेथे सोमवारी रात्रीपर्यंत स्थलांतर करण्यात आले. त्या ठिकाणी उपचारही सुरू करण्यात आले. सध्या नवीन कोविड रुग्णांवर त्यांच्या घरातच उपचार करण्यास प्राधान्य दिले जात आहे. त्यामुळे प्रशासनावरील ताण अजूनही कमी आहे. मात्र, पुढच्या काळात जर रुग्ण अधिकच संख्येने वाढले तर मात्र कोविड सेंटर्सची गरज भासणार आहे. त्यामुळे जशी गरज भासेल तशी कोविड केअर सेंटर्स सुरू करण्याचे नियोजन असल्याचे महापालिका उपायुक्त निखिल मोरे यांनी सांगितले.

चौकट

पाणी, स्वच्छतेची कमतरता

मंगळवारी डीओटी’मधील कोविड केअर सेंटला भेट दिली असता तेथे पिण्याच्या तसेच वापराच्या पाण्याची कमतरता तसेच स्वच्छतेचा अभाव असल्याचे दिसून आले. एक स्वतंत्र रुग्णवाहिकाही देण्यात आलेली नाही. त्या ठिकाणी सहा डॉक्टर्स व नर्स असून रुग्णांची संख्या वाढल्यास हा स्टाफ अपुरा पडणार आहे. त्यामुळे प्रशासनाने जादा स्टाफची व्यवस्था करायला पाहिजे. या केंद्रात रुग्णांचे जेवण, औषधे, तपासणी वेळेवर होत असल्याचे दिसून आले.

चौकट

डॉक्टर्स, नर्स नियुक्त्या सुरू

कोविड केअर सेंटर्स जशी सुरू होतील तशी तेथे आवश्यक डॉक्टर्स, नर्स, वॉर्डबॉय असा कर्मचारी वर्ग, कंत्राटी पद्धतीने नेमण्याची प्रक्रिया सुरू झाली आहे. या नेमणुकासुद्धा आवश्यकतेनुसार होत असल्याचे उपायुक्त मोरे यांनी सांगितले.