कुपोषित बालके व क्षयग्रस्त रुग्णांना कोंबड्यांचे वाटप

आजरा

आजरा तालुक्यातील कुपोषित बालके व क्षयरोग रुग्णांना अंड्यावरील कोंबड्यांचे शंभर टक्के अनुदानावर वाटप करण्यास आजपासून सुरुवात झाली आहे. जिल्हा पशुसंवर्धन उपायुक्त कोल्हापूर, आत्मा कोल्हापूर व जिल्हा कृषी विभाग कोल्हापूर यांच्यामार्फत आजरा तालुक्यातील १३४ कुपोषित व ६५ क्षयरोगग्रस्त रुग्णांना अंड्यावरील दहा कोंबड्या व एक कोंबडा शंभर टक्के अनुदानावर वाटप सुरू आहे. आज भादवण प्राथमिक आरोग्य केंद्रांतर्गत ५३ लाभार्थ्यांना याचे वाटप करण्यात आले.

मानवी आहारामधील अंड्याचे महत्त्व व कुपोषित बालकांच्या आहारामध्ये दररोज किमान दोन अंडी असणे आवश्यक आहे, असे पशुवैद्यकीय विस्तार अधिकारी डॉ. पी.एम. जालकर यांनी सांगितले. क्षयग्रस्त रुग्णांची रोगप्रतिकारक शक्ती वाढविण्यासाठी आहारात अंड्याचे महत्त्व आहे. कोंबड्यांमधील विविध आजार संगोपन व लसीकरण याबाबत डॉ. डी.ए. मुल्लांनी यांनी माहिती दिली.

कार्यक्रमास सभापती उदयराज पवार, उपसभापती वर्षा बागडी, जि.प. सदस्य उमेश आपटे, गटविकास अधिकारी बी.डी. वाघ, तालुका आरोग्य अधिकारी डॉ. यशवंत सोनवणे, बालविकास प्रकल्प अधिकारी नयना इंगोले, सुमन मोहिते, डॉ. ए.टी. पाटील यांच्यासह ग्रामस्थ उपस्थित होते. डॉ.पी. एम. जालकर यांनी आभार मानले.

जिल्ह्यात प्रथम आजरा तालुक्याची निवड

कुपोषित बालके, क्षयग्रस्त रुग्णांना १०० टक्के अनुदानावर कोंबड्यांच्या वाटपाची प्रक्रिया आजरा तालुक्यापासून केली आहे. कोरोनाचा प्रादुर्भाव असल्याने मास्क व सॅनिटायझरचा वापर करण्यात आला. तालुक्यातील दोन्ही मिळून १९५ लाभार्थ्यांना याचा लाभ मिळणार आहे.

फोटो कॅप्शन - भादवण ( ता. आजरा ) येथे कुपोषित बालके क्षयग्रस्त रुग्णांना कोंबड्यांचे वाटप करताना डॉ. पी.एम. जालकर, शेजारी डाॅ. डी.ए. मुल्लांनी यासह अन्य.