हेरिटेज समिती बरखास्त करा

कोल्हापूर : कोल्हापूर हे पौराणिक, ऐतिहासिक वास्तूंचे शहर आहे. मात्र हेरिटेज समितीचे दुर्लक्ष होत असल्याने अनेक वास्तू जमीनदोस्त झाल्या, काही वास्तूंची दुरवस्था आहे तर काही नामशेष होण्याच्या मार्गावर आहेत. तरी कोल्हापूर शहरातील सध्याची अकार्यक्षम हेरिटेज समिती बरखास्त करून नवीन तज्ञांची नियुक्ती करावी, अशी मागणी इतिहासप्रेमींनी केली आहे. याबाबतचे निवेदन सोमवारी उपायुक्त निखिल मोरे यांना दिले.

निवेदनात म्हटले आहे की, शहरातील ग्रेड १मधील शाहू मिलमध्ये अद्याप स्मारक उभारणीचे काम सुरू झालेले नाही. शाहू जन्मस्थळचे काम सुमार झाले आहे व उर्वरित काम रखडले आहे, करवीर नगर वाचन मंदिरचे प्रिन्स शिवाजी हॉल जमीनदोस्त झाले, शालिनी पॅलेस ही ऐतिहासिक वास्तू कित्येक वर्षे बंदावस्थेत आहे. भवानी मंडप परिसराला टपऱ्या आणि अतिक्रमणाने वेढले आहे. जयप्रभा स्टुडिओ, राजाज्ञा वाडा, महागांवकर बंगला, शालिनी सिनेटोन या वास्तू नामशेष झाल्या. या वास्तूंचे जतन संवर्धनाची जबाबदारी हेरिटेज समितीची असून जाणून बुजून त्याकडे दुर्लक्ष केले जात आहे. पदाधिकाऱ्यांना या कामाचा पूर्वानुभव नाही, या परंपरेशी काही देणे घेणे नाही, तरी सध्याची अकार्यक्षम हेरीटेज समिती बरखास्त करून नवीन तज्ञ व्यक्तींची नियुक्ती करण्यात यावी. निवेदनावर इतिहास संशोधक इंद्रजित सावंत, रविराज कदम, राम यादव, अमित आडसुळे यांच्या सह्या आहेत.

--

फोटो नं १२०४२०२१-कोल-हेरिटेज कमिटी

ओळ : कोल्हापुरातील इतिहासप्रेमींनी सोमवारी उपायुक्त निखिल मोरे यांना हेरीटेज समिती बरखास्त करावी, अशी मागणी निवेदनाद्वारे केली.

--