आजरा कारखान्याबाबत मुश्रीफांसह मुख्यमंत्र्यांशी चर्चा

कोल्हापूर : आजरा साखर कारखान्याबाबत ग्रामविकास मंत्री हसन मुश्रीफ यांच्यासह मुख्यमंत्री उद्धव ठाकरे यांच्याशी चर्चा करणार असल्याचे नगरविकास मंत्री एकनाथ शिंदे यांनी सांगितले.

शिंदे हे कोल्हापूरच्या दौऱ्यावर आले असता त्यांना आजरा साखर कारखान्याबाबत विचारणा केली. ते म्हणाले, या विषयावर चारच दिवसांपूर्वी मुख्यमंत्री, सहकारमंत्री आणि आमची चर्चा झाली आहे. विषय सर्वांच्या लक्षात आला आहे. त्यासाठी काय करायचे आहे हेदेखील ठरले आहे. त्यामुळे ग्रामविकास मंत्री मुश्रीफ यांच्यासह मी मुख्यमंत्र्यांकडे चर्चा करण्यासाठी जाणार आहोत.

कोणत्याही परिस्थितीत हा कारखाना सहकारी तत्त्वावर चालू राहिला पाहिजे यासाठी जे करणे शक्य आहे ते केले जाईल असे ते म्हणाले. दरम्यान, आमदार प्रकाश आबिटकर आणि आजरा साखर कारखान्याचे चेअरमन सुनील शिंत्रे यांनीही मंत्री शिंदे यांची भेट घेतली.