लॉकडाऊनचा गैरफायदा मुदत संपलेला माल ग्राहकांच्या माथी

गगनबावडा तालुक्यातील एका गावामध्ये मुदत संपलेल्या श्रीखंडाची विक्री राजरोस करण्यात येत होती; परंतु एका सुशिक्षित माणसाच्या हाती हे श्रीखंड पडल्याने या श्रीखंडामध्ये अळी सापडल्याने त्या गावामध्ये गाव बैठक घेण्यात आली. यामध्ये गगनबावडा तालुक्याच्या पूर्वेस असणाऱ्या एका कंपनीची ती श्रीखंड डबी मुदत संपूनही दुकानदार ग्राहकांच्या माथी मारत होते. त्यामुळे सदर दुकानदारांना गाव बैठकने पुन्हा असे घडल्यास कारवाईची धमकी दिल्याने यावर पडदा पडला परंतु याशिवाय काही दुकानदार आपला खाद्यपदार्थ माल अव्वाच्या सव्वा दराने विकत असून त्या दुकानदारांनी नागरिकांना वेठीस धरले आहे. गगनबावडा तालुक्यातील तहसील विभागाने या बाबीकडे गांभीर्याने लक्ष घालून ग्राहकांना वेठीस धरणाऱ्या किराणा दुकानदारावर कडक कारवाईची गरज आहे. यापूर्वी थंडपेयामध्ये, बटरमध्ये अळी सापडण्याची घटना गगनबावडा तालुक्यातील काही गावांमधील ग्रामस्थानी संबंधित ग्रामपंचायतमध्ये करण्यात आली होती. यामुळे गगनबावडा तालुक्यातील तहसील विभागाने याकडे तत्काळ लक्ष घालून ग्राहकांना वेठीस धरणाऱ्या या दुकानदारावर कारवाई करण्याची मागणी ग्राहकांतून होत आहे.