माणगाव येथे डी. ए. पाटील यांचा पुतळा उभारणार

लोकमत न्यूज नेटवर्क, रुकडी माणगाव : माणगाव हायस्कूलच्या प्रांग॔णात स्व. प्राचार्य दादा पाटील यांचा पुतळा उभारण्यास मान्यता देत असून, विवेकानंद संस्थेचा सुगंध दरवळण्याकरिता त्यांनी केलेले कार्य मैलिक आहे असे प्रतिपादन विवेकानंद शिक्षण संस्थेचे कार्याध्यक्ष प्रा. अभयकुमार साळुंखे यांनी केले. माणगाव, ता. हातकणंगले येथे प्राचार्य दादासो पाटील उर्फ डी. ए. पाटील यांच्या शोकसभेत त्यांनी आपल्या भावना व्यक्त केल्या.

कार्याध्यक्ष अभयकुमार साळुंखे म्हणाले की, काही व्यक्ती हे कर्तबगार असतात, प्राचार्य दादा पाटील हे त्यापैकी एक होते.

विवेकानंद शिक्षण संस्थेचे माजी आजीव सेवक टी. बी. पाटील यांनी प्राचार्य डी. ए. पाटील यांच्यामुळे माणगाव गाव हे शंभर टक्के साक्षर असून, माणगाव हे शिक्षकांचे गाव म्हणून ओळखले जाते. ते केवळ डी. ए. पाटील यांच्यामुळेच.

सरपंच राजू मगदूम म्हणाले की, प्राचार्य डी. ए. पाटील यांच्यामुळे गावची प्रगती झाली असून, विवेकानंद शिक्षण संस्थेचे नाव सातासमुद्रापार नेण्याचे काम त्यांनी केले. त्यांचा यथोचित सन्मान होण्यासाठी माणगाव हायस्कूलच्या प्रांग॔णात पुतळा उभारण्यास ग्राम पंचायत, माणगाव संपूर्ण सहकार्य करेल.

माजी मुख्याध्यापक आय. वाय. मुल्ला यांनी प्राचार्य डी. ए. पाटील हे माणगावचे भूषण होते, त्यांनी माणगावचे नाव मोठे केले असून पूज्य बापूजींचे आवडते विद्यार्थी होते, असे प्रतिपादन केले. कर्मवीर मल्टिस्टेटचे माजी चेअरमन सुकुमार पाटील यांनी माणगाव गावच्या वतीने श्रद्धांजली वाहिली.

दरम्यान, माजी राज्यपाल डी. वाय. पाटील यांनी प्राचार्य डी. ए. पाटील यांचे चिरंजीव रवींद्र पाटील यांच्याशी दूरध्वनीवरून माजी राज्यमंत्री प्रकाश आवाडे, जि. प. सदस्य राहुल आवाडे, शुभांगी गावडे, जि. प. सदस्य वंदना मगदूम, युवराज भोसले यांनी प्रत्यक्ष भेट घेऊन शोक व्यक्त केला.