लाकडापेक्षा तोडणीचा दर भरमसाट

थेट लाईन प्रश्न : महापालिकेचा आंधळा कारभार; प्रकार उघडकीस आल्यानंतर आयुक्तांनी ठेकेदाराचे बिल रोखले

कोल्हापूर : स्मशानभूमीकरिता लागणारी लाकडे प्रतिटन चार हजार रुपये दराने खरेदी केली जात असताना, महानगरपालिकेच्या अधिकाऱ्यांनी थेट पाईपलाईनला अडथळा ठरणारी झाडे केवळ तोडण्यासाठी तब्बल प्रतिटन ६१०० रुपये मोजले आहेत. ‘चार आण्याची कोंबडी अन् बारा आण्यांचा मसाला’ अशा पद्धतीच्या अजब कारभाराचा शनिवारी महानगरपालिकेच्या स्थायी समिती सभेत जाहीर पंचनामा झाल्यानंतर संबंधित ठेकेदाराचे बिल रोखण्याचे आदेश आयुक्त पी. शिवशंकर यांनी दिले.
कोल्हापूर महानगरपालिकेतर्फे काळम्मावाडी थेट पाईपलाईन योजना राबविली जात आहे. या योजनेतील जलवाहिनी टाकण्यासाठी खुदाई करण्यात येत असून या कामात अडथळा ठरणारी झाडे तोडावी लागत आहेत. झाडे तोडण्याचा ठेका बांड नावाच्या ठेकेदारास देण्यात आला आहे; परंतु हा ठेका ६१०० रुपये प्रतिटन या दराने दिला आहे. म्हणजे एक टन झाडे तोडली की त्याचा मोबदला म्हणून ६१०० रुपये द्यायचे आहेत; परंतु हा दर लाकडापेक्षा जादा असल्याने नगरसेवक सत्यजित कदम, अजित ठाणेकर यांनी प्रकरणाचा छडा लावला.
महापालिकेच्या स्मशानभूमीकरिता चार हजार रुपये प्रतिटन लाकडांची खरेदी करीत आहे. एका लाकूड व्यापाऱ्याने ३३०० रुपये प्रतिटन लाकडे देण्याची तयारी दाखविली आहे. जर एवढ्या कमी किमतीत लाकडे मिळत असतील तर त्यांचा तोडणीचा दर ६१०० रुपये कसा येऊ शकतो? अशी विचारणा कदम व ठाणेकर यांनी स्थायी समितीच्या सभेत करून आयुक्तांचे लक्ष वेधले. या विषयावर चर्चा असताना आयुक्त पी. शिवशंकर सभागृहात नव्हते; पण ते सभागृहात येईपर्यंत कामकाज थांबवावे, अशी सूचना कदम यांनी केली. आयुक्त शिवशंकर यांना निरोप गेल्यानंतर ते लगेच सभागृहात उपस्थित झाले. त्यांच्यासमोर लाकूड तोडण्याच्या कामात आंबा पाडला जात असल्याचा आरोप करण्यात आला. तसेच दरातील तफावत त्यांना पटवून देण्यात आली.
विशेष म्हणजे लाकूडतोडणीचा दर हा प्रमाणापेक्षा जास्त असल्याने अनेकांकडून दर मागवून त्याचा ठेका द्यावा, अशी शिफारस लेखापरीक्षक गणेश पाटील यांनी केली होती. तरीही त्याकडे दुर्लक्ष करुन काही अधिकाऱ्यांनी आपल्या मर्जीतील ठेकेदार बांड यांना ठेका दिला, असा आरोप सत्यजित कदम यांनी यावेळी केला. ठेकेदाराने आतापर्यंत तोडलेल्या १५१ टन लाकडांचे ९ लाख ६७ हजार रुपयांचे बिल देण्याचा निर्णय शनिवारच्या सभेत घेण्यात येणार होता. (प्रतिनिधी)

कंटेनरची दुरुस्ती रखडली
यंत्रशाळा विभागाकडील अधिकाऱ्यांच्या हट्टापायी कचरा उठावाच्या कामात आवश्यक असलेल्या कंटेनर दुरुस्तीचे काम रखडल्याचा आरोप कदम व ठाणेकर यांनी केला. मागच्या वेळी ३३ हजार ५०० रुपयांना एक याप्रमाणे कं टेनरच्या दुरुस्तीचा खर्च आला होता. आता तर नवीन कंटेनरची खरेदी ४५ हजार रुपयांनी करावयाची आहे. कंटेनर खरेदी करण्यापेक्षा महापालिकेच्या यंत्रशाळेत त्याची दुरुस्ती करण्यात यावी, असे आदेश आयुक्तांनी देऊनही त्याचे पालन अधिकाऱ्यांनी केले नाही. बाहेरील ठेकेदारांकडून त्यांची दुरुस्ती करून काही अधिकाऱ्यांना मलिदा मिळवायचा आहे, असा आरोप ठाणेकर यांनी केला.