सीपीआर, सावित्रीबाई फुले रुग्णालयातील रुग्णांच्या नातेवाईकांना चपाती-भाजी वाटप

कोल्हापूर : कोरोनाच्या सद्यस्थितीत ग्रामीण भागातील अनेक रुग्णांवर शहरातील रुग्णालयांमध्ये उपचार सुरू आहेत. या रुग्णांच्या नातेवाईकांची जेवण मिळण्यासाठी कसरत होत आहे. सीपीआर आणि सावित्रीबाई फुले रुग्णालयांतील अशा गरजू लोकांना मोफत चपाती-भाजी पुरविण्याचा उपक्रम रविवारी भारतीय जनता पार्टीच्यावतीने सुरू करण्यात आला. पहिल्या दिवशी २५० जणांना चपाती-भाजी वाटप करण्यात आली.

येथील सीपीआर रुग्णालयातील रुग्णांच्या नातेवाईकांना भाजप प्रदेशाध्यक्ष चंद्रकांत पाटील यांच्या हस्ते चपाती-भाजीचे वितरण करून या उपक्रमाची सुरुवात करण्यात आली. कोरोनाच्या कठीण प्रसंगी भाजपकडून विविध स्वरूपातील सेवाकार्य केले जात आहे. त्याअंतर्गत असलेला हा उपक्रम रुग्णांच्या नातेवाईकांना निश्चितपणे दिलासा देणारा असल्याचे प्रदेशाध्यक्ष पाटील यांनी सांगितले. पहिल्या दिवशीच्या उपक्रमासाठी सचिन तोडकर, भगवानराव काटे यांचे सहकार्य लाभले. यावेळी भाजपा प्रदेश कार्यकारिणी सदस्य महेश जाधव, जिल्हाध्यक्ष राहुल चिकोडे, अशोक देसाई, विजय जाधव, दिलीप मेत्राणी, हेमंत आराध्ये, विठ्ठल पाटील, गायत्री राऊत, मारुती भागोजी, चंद्रकांत घाटगे, राजू मोरे, दिग्विजय कालेकर आदी उपस्थित होते.

चौकट

रोज होणार वाटप

कोरोनाचा प्रादुर्भाव कमी होईपर्यंत हा उपक्रम राबविला जाणार आहे. सीपीआर आणि सावित्रीबाई फुले रुग्णालय येथे सोमवारपासून रोज सकाळी अकरा ते दुपारी बारा यावेळेत चपाती-भाजीचे वाटप केले जाईल. गृह अलगीकरण असलेल्यांसाठी टेलिमेडिसिन सुविधा सुरू करण्यात येणार असल्याचे जिल्हाध्यक्ष राहुल चिकोडे यांनी सांगितले.

फोटो (०९०५२०२१-कोल-चपाती भाजी वाटप (बीजेपी) : कोल्हापुरात रविवारी सावित्रीबाई फुले रुग्णालयात मोफत चपाती-भाजी वाटप उपक्रमाची सुरूवात भाजपचे प्रदेशाध्यक्ष चंद्रकांत पाटील यांच्या हस्ते करण्यात आली. यावेळी शेजारी भगवानराव काटे, विजय जाधव, राहुल चिकोडे, महेश जाधव, अशोक देसाई आदी उपस्थित होते.