कोविडची लस जिल्ह्यात दाखल

लोकमत न्यूज नेटवर्क

कोल्हापूर : जिल्ह्यात शनिवारपासून सुरू होणाऱ्या लसीकरणासाठी ३७ हजार ५८० डोस आज जिल्ह्यात दाखल झाले. या लसीकरणाची तयारी पूर्ण झाली असून, महापालिका क्षेत्रात ६ आणि जिल्ह्यातील ८ केंद्रांवर याचा प्रारंभ होणार आहे, अशी माहिती जिल्हाधिकारी दौलत देसाई यांनी बुधवारी दिली.

कोविड-१९ लसीकरणाच्या अनुषंगाने मोहिमेचे नियोजन व पूर्वतयारीचा आढावा घेण्यासाठी कोविड व्हॅक्सिन लसीकरण मोहीम जिल्हा कृती दल समितीची बैठक जिल्हाधिकारी कार्यालयात झाली. यावेळी ते बोलत होते.

जिल्हाधिकारी देसाई म्हणाले, या मोहिमेसाठी सामाजिक संस्था, वैद्यकीय संघटना, खासगी डॉक्टर्स या सर्वांचा सहभाग घ्यावा, बैठक आयोजित करावी. त्यामध्ये धर्मगुरूंना निमंत्रित करावे. तसेच सर्व लोकप्रतिनिधींना नजीकच्या केंद्रांवर शुभारंभप्रसंगी निमंत्रित करावे. महापालिका क्षेत्रात ६ आणि जिल्ह्यातील ८ अशा एकूण १४ केंद्रांवर प्रत्येकी १०० लाभार्थींप्रमाणे लसीकरण करण्यात येणार आहे. पोलीस प्रशासन, शिक्षण विभाग, ग्रामपंचायत विभाग, वैद्यकीय व्यावसायिक संघटना यांच्या समन्वयातून लसीकरण मोहीम यशस्वी करावी.

जिल्हा माता व बाल संगोपन अधिकारी डॉ. फारूख देसाई यांनी संगणकीय सादरीकरण करून सविस्तर माहिती दिली. यावेळी महापालिका आयुक्त डॉ. कादंबरी बलकवडे, वैद्यकीय महाविद्यालयाचे अधिष्ठाता डॉ. एस. एस. मोरे, जिल्हा शल्यचिकित्सक डॉ. अनिल माळी, जिल्हा आरोग्य अधिकारी डॉ. योगेश साळे, निवासी वैद्यकीय अधिकारी डॉ. हर्षला वेदक उपस्थित होत्या.

--

फोटो नं १३०१२०२१-कोल-कोव्हॅक्सीन कलेक्टर बैठक

ओळ : कोरोना लसीकरणाच्या पार्श्वभूमीवर बुधवारी जिल्हाधिकारी दौलत देसाई यांच्या अध्यक्षतेखाली कोविड लसीकरण मोहीम जिल्हा कृती दल समितीची बैठक झाली. यावेळी आयुक्त कादंबरी बलकवडे, डॉ. योगेश साळे यांच्यासह अधिकारी उपस्थित होते.

--