गडहिंग्लजमध्ये मोबाईल व्हॅनद्वारे कोरोना चाचणी

अत्यावश्यक सेवेअंतर्गत येणाऱ्या व्यापारी आणि त्यांच्याकडे येणाऱ्या कामगारांसह सर्व आस्थापनांतील कर्मचाऱ्यांची कोरोना चाचणी करण्याचे प्रशासनाचे आदेश आहेत. शासनाने व्यापारी, कर्मचाऱ्यांना सुपर स्प्रेडर घोषित केले असून त्यांची कोरोना चाचणी करून घ्यावी आणि आपले दुकान सकाळी १ ते ११ या वेळेत चालू ठेवावे, असे सांगितले आहे.

शासनाच्या निर्देशानुसार गडहिंग्लज शहरातील सर्व व्यापारी, कामगारांसह, विनाकारण रस्त्यावर फिरणाऱ्यांचीही कोरोनाची चाचणी करण्यासाठी उपजिल्हा रुग्णालय व पालिकेने मोबाईल व्हॅनद्वारे कोरोना चाचणीची मोहीम सुरू केली आहे.

उपनगराध्यक्ष महेश कोरी, पोलीस उपअधीक्षक गणेश इंगळे, मुख्याधिकारी नागेंद्र मुतकेकर यांच्या उपस्थितीत या मोहिमेला प्रारंभ झाला.

याप्रसंगी कोरी, मुतकेकर यांनी व्यापारी, कामगारांना कोरोना चाचणी करून घेण्याबाबत आवाहन केले. विनाकारण बाहेर फिरणाऱ्यांची कोरोना चाचणी करून दंडात्मक कारवाईच्या सूचनाही त्यांनी दिल्या.

शहरातील प्रत्येक चौकामध्ये व्हॅन नेऊन तपासणी केली जात आहे. त्यासाठी आरोग्य विभागाकडील कर्मचारी सर्व सुविधांसह सज्ज ठेवण्यात आले आहेत.

यावेळी नगरसेवक राजेश बोरगावे, नरेंद्र भद्रापूर यांच्यासह पालिका व उपजिल्हा रुग्णालयाचे कर्मचारी उपस्थित होते.

फोटो ओळी :

गडहिंग्लज पालिकेतर्फे शहरातील व्यापारी व विनाकारण बाहेर फिरणाऱ्यांची कोरोना तपासणी मोहीम राबविण्यात आली. नेहरू चौकात नागरिकांचे स्वॅब घेताना आरोग्य कर्मचारी.

क्रमांक : २२०४२०२१-०१