गुढीपाडवा सणावर कोरोनाचे सावट

इचलकरंजी : गुढीपाडवा म्हणजेच वर्ष प्रतिपदा होय. हिंदू धर्मातील एक महत्त्वाचा सण असून, यास नैसर्गिक, आध्यत्मिक व ऐतिहासिक महत्त्व आहे. त्यामुळे हिंदू धर्मातील लोक मोठ्या उत्साहाने हा सण साजरा करतात. मात्र, सध्या राज्यात कोरोनाचे महाभयंकर संकट असल्यामुळे गुढीपाडवा सणावर कोरोनाचे सावट निर्माण झाले आहे.

गुढीपाडव्यादिवशी वाहन, इलेक्ट्रॉनिक वस्तू व सोने खरेदी करण्यासाठी ग्राहकांची गर्दी होत असते. वस्त्रनगरीत यादिवशी लाखो रुपयांची उलाढाल होते. परंतु कोरोनाच्या दुसऱ्या लाटेमुळे खरेदीवर पुन्हा एकदा मर्यादा येत आहेत. कोरोनामुळे गतवर्षी २३ मार्चपासून लॉकडाऊन करण्यात आले होते. त्यानंतर कोरोनाचा प्रादुर्भाव कमी होत असताना अनलॉक करण्यात आले. काही दिवसांनी अर्थव्यवस्था पूर्वपदावर येत होती; पण सध्या पुन्हा एकदा लॉकडाऊन करण्याची परिस्थिती निर्माण झाली आहे. सलग दुसऱ्यावर्षी सण साजरा करता येत नसल्यामुळे व्यापारी वर्गातून चिंता व्यक्त केली जात आहे.

गतवर्षीच्या कोरोनामुळे अनेकांची आर्थिक परिस्थिती ढासळली होती. नागरिकांनी जी काही जमापुंजी केलेली होती, ती सर्व कोरोना काळात खर्च करण्यात आली. यावर्षीही लॉकडाऊन होणार, या भीतीपोटी ग्राहकांनी अत्यावश्यक वस्तू वगळता चैनीच्या वस्तू खरेदी करण्याकडे पाठ फिरवली असल्याचे दिसत आहे.

प्रतिक्रिया

यावेळी परत लॉकडाऊन होणार असल्यामुळे कोणत्याही मोबाईल कंपन्यांनी ऑफर दिलेली नाही, तर गतवर्षी कडक लॉकडाऊनमुळे व्यापार होऊ शकला नाही. सध्या व्यवसाय सुरू असूनही विक्री अत्यंत कमी आहे. त्यामुळे हे वर्षही नुकसानीत जाणार आहे.

रोहन देगावकर, मोबाईल विक्रेता.