बांधकामे आजपासून पुन्हा सुरू

कोल्हापूर : कोरोनाच्या पार्श्वभूमीवरील लॉकडाऊनमुळे गेल्या महिनापासून कोल्हापूर शहरातील बांधकाम प्रकल्पांचे काम बंद आहे. या प्रकल्पांची कामे सोमवारपासून पुन्हा सुरू होतील. पहिल्या टप्प्यात ५० प्रकल्पांचे काम सुरू होणार आहे.

कोरोनाचा प्रादुर्भाव वाढू लागल्याने राज्य शासनाने काही अटी घालून बांधकाम व्यावसायिकांना त्यांच्या प्रकल्पांचे काम सुरू ठेवण्यास परवानगी दिली. त्यामध्ये मजूर, कामगारांना प्रकल्पाच्या ठिकाणी राहणे, जेवणाची व्यवस्था करण्याच्या अटींचा समावेश होता. त्यामुळे काही ठराविक प्रकल्पांचे काम सुरू होते. पुन्हा गेल्या आठ दिवसांचा कडक लॉकडाऊन सुरू झाल्याने सर्व बांधकाम प्रकल्पांचे काम ठप्प झाले. आता कडक लॉकडाऊनपूर्वीच्या अटीनुसार सोमवारपासून बांधकामे पूर्ववत सुरू करण्याचा निर्णय क्रेडाई कोल्हापूरच्या सदस्य असलेल्या बांधकाम व्यावसायिक, विकसकांनी घेतला आहे. प्रकल्पस्थळी कामगारांची व्यवस्था केलेल्या शहरातील ताराबाई पार्क, कसबा बावडा, फुलेवाडी रिंगरोड, नागाळा पार्क, आदी परिसरातील ५० बांधकाम प्रकल्पांचे काम सोमवारपासून सुरू होईल. त्यादृष्टीने आवश्यक तयारी बांधकाम व्यावसायिकांनी केली आहे. मान्सून सुरू होण्यापूर्वी इमारतींच्या बेसमेंटचे काम करणे आवश्यक असते. शहरातील अशा विविध ठिकाणांवरील २२ इमारतींच्या बेसमेंटचे काम पूर्ण करावे लागणार आहे. या कामांसाठी महानगरपालिकेने लवकर परवानगी द्यावी, अशी मागणी क्रेडाई कोल्हापूरचे अध्यक्ष विद्यानंद बेडेकर यांनी रविवारी केली.

चौकट

बांधकाम साहित्याच्या दुकानांची वेळ वाढवावी

काम सुरू असलेल्या प्रकल्पांवर बांधकाम साहित्य संपत आले आहे. त्यामुळे शहरातील बांधकाम साहित्याची दुकाने एक तर दिवसभर सुरू ठेवावीत, अन्यथा त्यांना वेळ वाढवून द्यावा. बांधकाम प्रकल्पांवर काम करणाऱ्या मजूर, कामगारांना कोरोना प्रतिबंधक लस देणे आवश्यक आहे. पहिल्या टप्प्यात ४५ वर्षांवरील मजूर, कामगारांचे लसीकरण करावे. महानगरपालिकेकडे येत्या दोन दिवसांमध्ये करणार असल्याचे बेडेकर यांनी सांगितले.