कोल्हापूर: काेल्हापूर उत्तर विधानसभा पोटनिवडणुकीतील विजयानंतर काँग्रेसच्या राष्ट्रीय नेत्या प्रियांका गांधी यांनी ट्विटद्वारे आमदार जयश्री चंद्रकांत जाधव यांचे अभिनंदन केले. त्याचबरोबर काँग्रेसवर विश्वास दाखवून मतदान केल्याबद्दल कोल्हापूरच्या जनतेचे आभारही त्यांनी मानले आहेत.
पाच राज्यांत काँग्रेसचा मोठा पराभव झाला होता, या पार्श्वभूमीवर ‘कोल्हापूर उत्तर’ची पोटनिवडणूक लागली. एकाबाजूने भाजपकडून हल्ले होत असताना तेवढ्याच संयमाने ते परतवून लावत जयश्री जाधव यांना विजयापर्यंत पोहोचविले.
देशात काँग्रेसचे पानिपत होत असताना कोल्हापुरात भाजपला रोखल्याने या निवडणुकीला वेगळे महत्त्व आहे. कोल्हापूरसह छत्तीसगड विधानसभा पोटनिवडणुकीत काँग्रेसचे उमेदवार विजयी झाल्याने देशात एक काँग्रेसच्या दृष्टीने चांगला संदेश गेला आहे. या पार्श्वभूमीवर काँग्रेसच्या राष्ट्रीय नेत्या प्रियांका गांधी यांनी ट्विटद्वारे आमदार जयश्री जाधव यांचे अभिनंदन केले. त्याचबरोबर कोल्हापूरच्या मतदारांनी काँग्रेस विचारावर विश्वास दाखवत मतदान केल्याबद्दल त्यांचे आभार मानले.