केंद्र सरकार विरोधात कॉंग्रेसची निदर्शने

लोकमत न्यूज नेटवर्क

कोल्हापूर : केंद्र सरकार आणि पंतप्रधान नरेंद्र मोदी यांची सात वर्षांची कामगिरी अपयशी ठरल्याचा आरोप करीत त्यांच्याविरोधात येथील कॉंग्रेसतर्फे रविवारी जोरदार निदर्शने करण्यात आली. कॉंग्रेस कमिटीसमोर झालेल्या निदर्शनात पंतप्रधान मोदींच्या कारभाराविरोधात जोरदार घोषणा देत परिसर दणाणून सोडले. पालकमंत्री सतेज पाटील, आमदार पी. एन. पाटील, आमदार जयंत आसगावकर, आमदार चंद्रकांत जाधव, आमदार ऋतुराज पाटील यांची प्रमुख उपस्थिती होती.

कॉंग्रेसचे प्रांताध्यक्ष नाना पटोले यांच्या आदेशानुसार केंद्रातील मोदींच्या विरोधात निदर्शने आयोजित केली होती. यावेळी पेट्रोल, डिझेल दरवाढ, कोराना साथ नियंत्रणात न आणणे, देशाची ढासळलेली अर्थव्यवस्था, वाढलेली बेरोजगारी, शेतकरीविरोधी काळे कायदे, सरकारी कंपनी विकायला काढणे या विषयावर जोरदार घोषणा देण्यात आल्या. ‘सात वर्षांत ना केला विकास, मोदींनी केला देश भकास’ अशी घोषणाही लक्षवेधी ठरली. यावेळी ‘देश विक्रीचा मसुदा’, ‘मी अपयशी’ अशा आशयाचा फलक हातात असलेल्या मोदींच्या प्रतिमेचा पूर्णाकृती फलक लक्ष वेधून घेत होता. सहभागी सर्वच नेते आणि पदाधिकाऱ्यांनी हाताला काळ्या फिती बांधून केंद्र सरकारचा निषेध नोंदवला.

निदर्शनात शहर कॉंग्रेस कमिटीचे अध्यक्ष प्रल्हाद चव्हाण, अॅड. सुरेश कुराडे, अॅड. गुलाबराव घोरपडे, शंकरराव पाटील, तौफिक मुल्लाणी, संजय पवार, संध्या घोटणे आदी पदाधिकारी, कार्यकर्ते उपस्थित होते.

----------

फोटो : ३००५२०२१- कोल- निदर्शने

कोल्हापुरातील कॉंग्रेस कमिटीसमोर रविवारी केंद्र आणि पंतप्रधान नरेंद्र मोदीविरोधात आयोजित केलेल्या निदर्शनात सतेज पाटील, पी. एन. पाटील, ऋतुराज पाटील, जयंत आसगावकर, चंद्रकांत जाधव आदी सहभागी झाले होते.

फोटो : नसीर अत्तार