आमदार ऋतुराज पाटील यांच्या वाढदिवशी ‘गरजूंना मदत’ ही संकल्पना

कोल्हापूर : येथील कोल्हापूर दक्षिण मतदारसंघाचे आमदार ऋतुराज संजय पाटील यांचा सोमवारी (दि. ३१ मे) वाढदिवस आहे. या दिवशी गरजूंना मदत ही संकल्पना घेऊन कार्यकर्ते, हितचिंतक, मित्रपरिवार यांनी आपल्या भागातील, परिसरातील, गावातील गरजू लोकांना कोणत्याही स्वरूपात शक्य असेल त्याप्रमाणे मदत करावी, असे आवाहन आमदार पाटील यांनी केले आहे.

कोरोनाच्या पार्श्वभूमीवर आमदार पाटील हे वाढदिवस साजरा करणार नाहीत. कोरोनामुळे समाजातील अनेक लोकांसमोर आर्थिक संकट उभे राहिले आहे. रोजंदारी करून पोट भरणाऱ्या लोकांना दोन वेळचे जेवण सुद्धा मिळणे मुश्कील झाले आहे. त्यामुळे या गरजू लोकांना धान्य वाटप, जेवण, कोणत्याही स्वरूपाची मदत करून त्यांना आधार द्यावा. शहरात आणि ग्रामीण भागात ठिकठिकाणी कोविड सेंटर सुरू करण्यात आली आहेत. या ठिकाणी जर काही साहित्याची गरज असेल तर ते साहित्य द्यावे, असे आवाहन आमदार पाटील यांनी केले आहे.