कोरोना लसीकरणात शहर पिछाडीवर

लोकमत न्यूज नेटवर्क

कोल्हापूर : कोरोना प्रतिबंधात्मक लसीकरणात ग्रामीण भागाने आघाडी घेतली आहे. ग्रामीण भागात आजवर ७७ टक्के लसीकरण पूर्ण झाले असून, हेच प्रमाण कोल्हापूर शहरात केवळ ३८ टक्के इतके आहे. आरोग्य कर्मचारी व पोलीस, महसूल महापालिका, नगरपालिका, पंचायतराज असे फ्रंट लाइन वर्कर असे मिळून आजवर २८ हजार ६७७ कर्मचाऱ्यांचे लसीकरण झाले असून, ते टार्गेटच्या ४४ टक्के आहे. त्यामुळे गुरुवारी झालेल्या बैठकीत जिल्हाधिकारी दौलत देसाई यांनी लसीकरण वाढवण्याची जबाबदारी विभागप्रमुखांवर सोपवली असून, त्याचा कार्यालयनिहाय अहवाल बनवावा, असे निर्देश दिले आहेत.

जिल्हाधिकारी कार्यालयातील छत्रपती राजर्षी शाहू सभागृहात कोरोना लसीकरण मोहीम जिल्हा कृती दल समितीची बैठक जिल्हाधिकाऱ्यांच्या अध्यक्षतेखाली झाली. जिल्हा माता व बालसंगोपन अधिकारी डॉ. फारूख देसाई यांनी संगणकीय सादरीकरण करून आजअखेरचा अहवाल दिला. यावेळी जिल्हा परिषदेचे मुख्य कार्यकारी अधिकारी संजयसिंह चव्हाण, जिल्हा आरोग्य अधिकारी डॉ. योगेश साळे, जिल्हा शल्यचिकित्सक डॉ. अनिल माळी उपस्थित होते.

जिल्हाधिकारी देसाई म्हणाले, प्रत्येक विभाग प्रमुखाने नोंदणी झालेल्या अधिकारी-कर्मचारी यांचे समुपदेशन करावे. त्यांचे लसीकरण होईल याची जबाबदारी पार पाडावी. आरोग्य विभागाने लसीकरणाबाबत समुपदेशनावर भर द्यावा. जिल्ह्यात जास्तीत-जास्त लसीकरण होईल, याबाबत सर्वांनी प्रयत्न करावा.

----

लसीकरणासाठी ३४ हजार ९६७ आरोग्य कर्मचारी व २९ हजार ८२१ फ्रंट लाइन वर्कस असे ६४ हजार ७८८ कर्मचाऱ्यांचे उद्दिष्ट्य ठेवण्यात आले होते. त्यापैकी लसीकरण झालेले कर्मचारी असे

आरोग्य कर्मचारी : २३ हजार ६३३ (६८ टक्के)

फ्रंट लाइन वर्कर्स : ५ हजार ४४४ (३४ टक्के)

--

ग्रामीण भागातील कर्मचारी : १९ हजार ४३२ (५८ टक्के)

कोल्हापूर महापालिका क्षेत्रातील कर्मचारी : ९ हजार २४५ (४८ टक्के)

---

१ ते ८ मार्च दरम्यान राष्ट्रीय जंतनाशक मोहीम, दहा लाख मुलांना लाभ

१ ते १९ वयोगटांतील सर्व मुला-मुलींना जंतुनाशक गोळी देऊन त्यांचे आरोग्य चांगले ठेवणे. पोषण स्थिती, शिक्षण व जीवनाचा दर्जा उंचावणे यासाठी १ ते ८ मार्च या कालावधीत राष्ट्रीय जंतनाशक मोहीम राबविण्यात येणार आहे. याचा लाभ जिल्ह्यातील दहा लाख मुलांना होणार आहे. याबाबतदेखील बैठकीत चर्चा करण्यात आली. यावेळी जिल्हाधिकाऱ्यांनी शाळा, महाविद्यालयातील विद्यार्थ्यांबरोबरच ऊसतोड कामगार आणि वीट भट्टी कामगारांच्या मुलांनाही या मोहिमेचा लाभ दिला जावाव तशी कार्यवाही करावी, अशी सूचना केली. सध्या अंगणवाडी व शाळा बंद असल्याने अंगणवाडी व आशासेविकांमार्फत या जंतुनाशक गोळ्या मुलांपर्यंत पोहोचविण्यात येणार आहेत.

----

फोटो नं २५०२२०२१-कोल-कोरोना लसीकरण

ओळ : कोल्हापुरातील जिल्हाधिकारी कार्यालयात गुरुवारी जिल्हाधिकारी दौलत देसाई यांच्या अध्यक्षतेखाली कोरोना लसीकरण आढावा बैठक झाली. यावेळी जिल्हा परिषदेचे मुख्य कार्यकारी अधिकारी संजयसिंह चव्हाण, डॉ. योगेश साळे, डॉ. अनिल माळी, डॉ. फारुख देसाई यांच्यासह अधिकारी उपस्थित होते.

---