शित्तूर-वारुणमध्ये चुरशीची लढत

सतीश नांगरे

शित्तूर-वारुण : शाहूवाडी तालुक्याच्या उत्तर भागातील शित्तूर-वारुण ग्रामपंचायतीची निवडणूक चुरशीने होणार असल्याचे चित्र आहे. ही निवडणूक बिनविरोध करण्यासाठी प्रयत्न केला गेला. मात्र समझोता होऊ शकला नाही. जनसुराज्य व शिवसेना यांच्यामध्ये मुख्य लढत असून पाच अपक्ष उमेदवारांच्या उमेदवारीमुळे या निवडणुकीत अधिक रंगत येणार आहे.

आमदार डॉ. विनय कोरे व माजी आमदार सत्यजित पाटील यांचे गट एकमेकांसमोर उभे आहेत. या निवडणुकीत जनसुराज्य, काँग्रेस व शेतकरी कामगार पक्षाची आघाडी आहे; तर शिवसेनेबरोबर राष्ट्रवादीची युती आहे. गतवेळी शिवसेनेविरोधात याच आघाडीने विजय मिळविला होता. त्या आधीच्या पंचवार्षिकमध्ये शिवसेनेची एकहाती सत्ता होती. ‘तव्यावरची भाकरी करपण्याआधी ती पालटावी’ या न्यायाने दर पंचवार्षिक निवडणुकीत या गावामध्ये सत्ताबदल होत असतो.

सत्ताधाऱ्यांनी गेल्या पाच वर्षांत गावामध्ये आमदार विनय कोरे, माजी खासदार राजू शेट्टी, जिल्हा परिषदेचे सदस्य सर्जेराव पाटील, करणसिंह गायकवाड, भाई भारत पाटील या नेत्यांच्या सहकार्यामुळे अनेक विकासकामे राबविली आहेत. या विकासकामांच्या जोरावरच या आघाडीचे कालिका ग्रामविकास परिवर्तन पॅनेल मैदानात उतरले आहे. या दोन्ही पॅनेलच्या विरोधात यावेळी पहिल्यांदाच गावामध्ये पाच अपक्ष उमेदवार रिंगणात उतरले आहेत.

अनुसूचित जाती वर्गाचा समावेश असलेल्या प्रभाग १ मध्ये एकूण पाच उमेदवार रिंगणात उतरले आहेत. पैकी तीन उमेदवार अपक्ष आहेत.

सदस्य- ११, प्रभाग- ४, एकूण मतदार- ३२७९