रासायनिक सांडपाणी विनाप्रक्रिया थेट काळ्या ओढ्यात

इचलकरंजी : औद्योगिक रासायनिक सांडपाण्यावर प्रक्रिया करणारी यंत्रणाच बंद असल्याने ते पुन्हा विनाप्रक्रिया थेट काळ्या ओढ्यात सोडले जात असल्याचा धक्कादायक प्रकार शनिवारी उघडकीस आला. त्यामुळे याप्रकरणी सामूहिक औद्योगिक सांडपाणी प्रकल्प (सीईटीपी) यांच्या निष्काळजीपणाची तक्रार राज्य प्रदूषण नियंत्रण मंडळाकडे करणार असल्याची माहिती पाणीपुरवठा सभापती दीपक सुर्वे यांनी दिली.

शहरातील प्रोसेसमधून कापडावर प्रक्रिया केल्यानंतर बाहेर सोडले जाणारे रसायनमिश्रित सांडपाणी एकत्र करून त्यावर प्रक्रिया करून ते काळ्या ओढ्यात सोडले जावे. जेणेकरून प्रदूषणाची तीव्रता कमी होण्यासह शहरवासीयांच्या आरोग्याचा प्रश्‍न निर्माण होऊ नये, यासाठी आमदार प्रकाश आवाडे यांनी नगर परिषदेच्या माध्यमातून शहरात सीईटीपी प्रकल्प उभारला. हा प्रकल्प शहरातील उद्योगांसाठी संजीवनी ठरला होता; परंतु गत काही वर्षांपासून या प्रकल्पाबाबत सातत्याने तक्रारी येत आहेत. त्या तक्रारींच्या अनुषंगाने पाणीपुरवठा सभापती दीपक सुर्वे, आरोग्य सभापती संजय केंगार, नगरसेवक शशांक बावचकर, राजू आलासे, बाजी कांबळे व अधिकाऱ्यांनी सीईटीपी व काळ्या ओढ्याची पाहणी केली.

त्यामध्ये सीईटीपी येथून बोहरा मार्केट परिसरातून गेलेल्या काळ्या ओढ्यातून दोन वेगवेगळ्या ठिकाणांहून पाणी जात असल्याचे निदर्शनास आले. त्याची माहिती घेतली असता एका ठिकाणी गटारींमधून येणारे सांडपाणी, तर दुसरीकडे सीईटीपी येथून सोडलेले सांडपाणी निदर्शनास आले. सीईटीपी येथे प्रक्रिया करून पाणी सोडल्याचे सांगितले जात असले तरी ओढ्यात येणारे पाणी रसायनमिश्रित व काळसर असल्याचे दिसून आले. त्यामुळे ओढ्यात मिसळणाऱ्या पाण्याचे दोन्ही नमुने तपासणीसाठी घेण्यात आले. त्यानंतर सर्वांनी थेट सीईटीपी येथे जाऊन पाहणी केली. तेथे औद्योगिक सांडपाण्यावर प्रक्रिया केली जाणारी यंत्रणाच बंद असल्याचे निदर्शनास आले. त्यामुळे विनाप्रक्रिया सांडपाणी थेट ओढ्यात सोडले जात असल्याचा धक्कादायक प्रकार उघडकीस आला. या प्रकारामुळे सीईटीपीचा कारभार पुन्हा एकदा चव्हाट्यावर आला आहे. यासंदर्भात माहिती देताना पाणीपुरवठा सभापती सुर्वे यांनी, सीईटीपीमधील या निष्काळजीपणाबद्दल आपण खासदार धैर्यशील माने, आमदार प्रकाश आवाडे यांच्यासह राज्य प्रदूषण नियंत्रण मंडळाकडे तक्रार करणार आहोत. सीईटीपी येथील व्यवस्थापनाकडून नागरिकांच्या आरोग्याशी खेळ केला जात आहे. तो कदापिही सहन केला जाणार नाही. दोषींवर निश्‍चित कारवाई व्हावी यासाठी आपण प्रयत्न करणार असल्याचेही त्यांनी सांगितले.

२० आयसीएच सांडपाणी

(फोटो ओळी) इचलकरंजीतील सीईटीपी प्रकल्पातून विनाप्रक्रिया काळ्या ओढ्याला सोडले जाणाऱ्या पाण्याचे नमुने सभापती दीपक सुर्वे, संजय केंगार, नगरसेवक शशांक बावचकर, बाजी कांबळे आदींनी घेतले.